Pan nga Nagapalig-on sa Pagtuo

(An excerpt of the homily of the Most Rev. Romulo G. Valles, D.D., during his Pastoral Visit (GKK Mass) At San Isidro Labrador Parish Lumondao (Day 2), August 3, 2024.)

Busa karong Dominggoha kay Dominggo naman atong Misa mangutana kita ug unsa man ang makalig-on sa atong pagtoo? Unsa man ang atong gisaulog? Unsang bahina sa atong Kristohanong Kinabuhi ang atong gisaulog? Pagkanindot sa atong Misa karon atol sa atong pagsaulog atong nabati ang mga pagbasa, gani ang Unang Pagbasa karon ug ang Ebanghelyo nagalarawan sa particular nga punto nga very precious, mahal kaayo sa atong Roman Catholic Faith ang Unang Pagbasa, Karaang Testamento gigutom ang mga Israelitas gikan sa Ehipto. Katong bag-o palang silang gipagawas sa Ehipto yey! Sus pagkasunod-sunod miingon sila maypa mobalik sa Ehipto kay gutom kaayo dinhi, maypa mamatay sa Ehipto kay makakaon pa didto, paita pud ani. Nigawas sila nagbagulbol, murag kita nagabulbol unya miingon ang Ginoo “Moises gutom naman na imong mga sakop sige ako’y bahala ana.” Mao kadto naghatag siya’g pan nga nipis, grasya sa Dios gitawag kini ug manna.

Makita nato nga sa Unang Pagbasa ug Ebanghelyo karon naghisgot ug Pan. Unya miingon ang Ebanghelyo, “Ako ang Pan sa Kinabuhi, ang mokaon Kanako, makabaton sa kinabuhing walay katapusan. Ang Misa mao kana ang gisaad nga Pan sa Kinabuhi, kining pan mao ang akong lawas, kining bino maoy akong dugo. Mao kini ang gisaad nga pan gikan sa langit, nag-ingon pa ang Ginoo: “Buhata kini sa Akong handumanan”. Busa mga igsuon, naminaw kita, nalipay kita mga Katoliko kay duna kitay Misa. Bantayan nato ang Misa, pinakasentro nga lihok, pinasentro nga pag-ampo kay si Jesus mismo nagsugo niini “Buhata kini sa Akong handumanan”. Handumanan kini sa pan nga gikan sa langit, ang mokaon sa pan, ang Santos nga pagkalawat mao kini ang giya sa kinabuhi nga walay katapusan. Pagkanindot sa batasan sa mga Katoliko nga adunay Santos nga Misa.