Pormasyon sa Pulong

Subay sa pagpangandam sa pagsaulog sa ika-setentay singko nga anibersaryo sa Arkidiyosis sa Dabaw, niadtong Agosto 5, 2024 gisaulog sa Fraternity of the Diocesan Clergy of Davao ang tinuig nga Vianney Day nga gipahigayon sa St. Francis Xavier College Seminary, Catalunan Grande Davao City.

Ang maong kasaulogan gilangkuban sa mga kaparian sa Archdiocese of Davao kauban ang pipila sa mga kaparian gikan sa mga religious congregations.

Gisugdan ang selebrasyon pinaagi sa Holy Hour nga gipanguluhan ni Rev. Fr. Ruperto Jamili III sa alas dos-e-medya ang takna sa hapon ug gisundan sa Conversation in the Spirit diin ang mga kaparian nabahin sa nagkadaiyang mga grupo alang sa hamubo nga pag-inambitay. Usa ka pag-inambitay nga naghagit sa matag usa sa pagpaminaw ilabi na kon asa kita gidala sa Balaang Espiritu. Ang Coversation in the Spirit dili lamang usa ka “generic nga pagbinayloay og mga ideya, apan usa ka dinamiko diin ang pulong [nga] gilitok ug nadungog makamugna og pagkapamilyar ug makapahimo sa mga partisipante nga mas magkasuod sa usag usa” (Instrumentum Laboris, 33). Human niini misunod dayon ang pagsaulog sa Santos nga Eukaristiya nga gipanguluhan ni Archbishop Romulo G. Valles, D.D.

Diha sa iyang homiliya gihatagan ug dakong importansiya sa atong arsobispo ang paghinumdom kang San Juan Marie Vianney, isip patron sa mga kaparian ug sa atong mahal nga Inahan Birhen Maria isip paghandum sa pagdedikar sa usa ka Basilica alang sa Inahan sa Ginoo didto sa Roma niadtong adlawa.

Agi’g pagdasig, gipahinumduman ni Archbishop Valles ang mga kaparian nga kanunay nga mangayo sa mga pangaliya ug panabang sa Mahal nga Inahan ug kang San Juan Marie Vianney ngadto sa Ginoo, ang Labaw’ng Pari alang sa pangpanalangin kanila diha sa ilang ministriya. Matud pa niya nga lakip sa mga pag-ampo mao ang pagpangayo ug kusog ug kaisog sa pag-atubang sa mga kalisdanan nga moabot. Kini, aron nga sila mahimong usa ka tawo nga anaa taliwala sa katawhan nga maghatag ug paglaum kanila ug pagsalig bisan pa man kung ang maong paglaum ug pagsalig dili makalkyula. Tungod kay luyo sa tanan, sila nga mga kaparian nakadesinyo man dili subay sa kalibotanon panig-ingnan apan sila mga instrumento nga gipadala sa usa ka Ginoo nga labaw pa kanila.

Human sa Santos nga Misa nagpadayon ang mga misunod nga aktibidad sama sa dialogue sa mga kaparian ug ang fellowship dinner. (Sem. Resty Cabahug)