Beynte-Singko Sa Setentay-Singko

(Ang Kasaulogan sa ika-25 nga Anibersaryo sa Dedikasyon sa Sta. Ana Shrine Parish, Sta. Ana Avenue, Davao City)

Kabahin sa pagpangandam sa ika-setentay singko nga kapistahan sa Sta. Ana Shrine Parish, niadtong Hulyo 24, 2024 atol sa ika-walo nga adlaw sa ilang nobena gipahigayon usab ang pagsaulog sa ika-byente-singko nga anibersaryo diin ang Parokya gipataas isip usa ka Shrine dinhi sa Arkidyosis sa Davao.

Sa pagsaulog sa Santos nga Misa nga gipanguluhan ni Rev. Fr. Jose Junar dela Victoria, adunay gipahigayon ang ritwal sa pagbutang sa mga lampara sa matag haligi sa Parokya agig paghinumdom sa pagkadeklara niini isip usa ka Shrine beytne-singko ka tuig ang milabay. Subay usab sa maong kasaulogan, ang mga nagpresenta sa mga lampara mao ang mga managtiayong beynte-singko na usab ka tuig nga nagserbisyo sa ilang nagkadaiya nga mga GKK. Ug kining maong mga lampara nga ilang gidala gitunol kini nila ngadto sa mga batan-on nga anaa sa matag estasyon nga pagabutangan sa mga lampara. Usa ka kalihokan nga nagsimbolo nga ang natukod nga pagtoo sulod sa tuig gikan natukod ang maong Parokya ilabi na sa panahon nga kini gideklara nga usa ka Shrine mapasa didto sa mga kabatan-onan.

Si. Fr. Junar, diha sa iyang homiliya, nagbalik lantaw sa mga katuigan kon diin gisugdan ang pagtukod sa Parokya ni Sta. Ana hangtud sa nadeklara kini nga usa ka Shrine. Matud pa niya nga ang pagtukod niini nagagikan sa inisyatibo sa mga PME Fathers o Fathers of the Foreign Mission Society of Quebec ug kanonikal nga gitukod niadtong Hulyo 26, 1949. Ug niadtong tuig 1999 nadeklara kini isip usa ka Shrine uban ni kanhi Msgr. Leonardo Vicente.

Sa maong kasaulogan gipasabot usab ni Fr. Junar nganong gitawag kini ug usa ka shrine. Ingon pa niya nga tungod kay giila sa Simbahan ang nagalungtad nga debosyon nga milabaw pa sa normal nga debosyon ngadto kang Sta. Ana sa maong parokya. Ug ang maong mga deboto niini nagagikan pa sa nagkalain-laing mga dapit. Lakip sa maong deklarasyon mao ang ang pag-atiman sa mga deboto o pilgrims nga nagaduaw sa maong Parokya pinaagi sa solemne nga pagsaulog sa Santos nga Eukaristiya ug sa uban pang mga sakramento labi na ang sakramento sa pakig-uli. (Sem. Resty Cabahug)