Cardinal Tagle namulong sa ReMaSe Jubilee

DAVAO CITY — Gatusan ka mga Pari, Madre, Brothers, Seminarista og mga Laykong Misyonaryo misalmot alang sa ika-50 nga Jubilee sa REMASE kon Regional Major Seminary.

Giablihan sa Arsobispo sa Davao, Romulo Valles, D.D. ang 3 ka adlaw nga okasyon pinaagi sa Misa didto sa ReMaSe gym, Hulyo 9, uban sa iyang maalamong pamalandong.

Sa ikaduhang adlaw, gihagit ni Cardinal Tagle  atol sa iyang pagpamulong ang tawag sa mga kaparian diha sa diwa ug pulso sa Batikano II nga mamahimong Simbahan nga magdala sa maayong balita sa kaluoy sa tanan ug dili sa paghukom.

Ang panapos nga Misa gisaulog sa San Pedro Cathedral ug gipangunahan ni Most Rev. Romulo T. dela Cruz, D.D., Arsobispo sa Zamboanga, Hulyo 11.

Atol sa homiliya nga gihatag ni Bishop Guillermo Afable, D.D., Obispo sa Digos, iyang gipahinumdoman ang katawhan ilabi na ang mga seminarista og REMASE alumni nga magkinabuhi nga malipayon, adunay integridad og mahigugmaon. Kini subay sa giingon ni San Juan, “Kamo wala nagpili kanako, hinonoa ako mao ang nagpili kaninyo.”

Ang REMASE mao ang kinadak-an nga seminaryo sa Mindanao. Sa kasamtangan, aduna kini 801 ka graduates, 7 niini nahimong Obispo sa mga nagkalainlaing dapit.

Ang jubilee nahimong kahigayonan sa paghimamatay sa mga alumni sulod sa 50 na katuig ug napalig-on ang tawag sa pagkapari apil na ang mga seminarista nga nagpadulong pa.

Uban sa mga formators sa ReMaSe, malipayong mitimon sa alumni homecoming isip kabahin sa maong okasyon ang sponsoring batch 1999 nga gipangulohan ni Fr. Loloy Mahinay sa Diocese sa Mati ug propesor usab sa ReMaSe.(JP R. Garado)