Panagtagbo: Indigenous Peoples Youth Summit 2024

Sa atong pagpadayon sa pagtubag sa tawag sa atong Santo Papa sa pag-amping sa kinaiyahan, anaa usab ang pagdapit sa pag-ila ug paghatag og bili sa atong mga lumad nga kaigsonan. Kahinumduman nga nga si Papa Francisco miingon nga ang Katawhang Lumad, uban sa ilang “nagkadaiyang mga pinulongan, kultura, tradisyon, kahibalo ug mga pamaagi”, kinahanglan “mahimong usa ka tawag sa pagpukaw sa tanan, nga magpasiugda sa kamatuoran nga ang tawo dili tag-iya sa kinaiyahan, kondili tigdumala lamang.”

Subay sa maong tawag, niadtong Hulyo 19, 2024 gitapos ang duha ka adlaw nga pagpahigayon sa pinakaunang Indigenous Peoples Youth Summit dinhi sa Arkidiyosis sa Dabaw. Si Dr. Josephine Estopiel, Executive Director sa Josefa Segovia Foundation, miingon nga tumong sa maong kasaulogan mao ang pagpakita sa hiniusang kusog sa nagkadaiyang tribu sa mga katawhang lumad sa atong siyudad. Usab sa maong pagsaulog gihatagan nila ug importansiya ang edukasyon alang sa atong mga kaigsoonan. Sa katapusan sa iyang mensahe miingon siya nga unta ang matag usa mamahimong instrumento sa panagtagbo sama sa hangyo sa atong Santo Papa.

Sa maong kalihokan ila usab gipadayag ang ilang paghiusa ug ang ilang maanindot nga kultura pinaagi sa usa ka maanindot nga presentasyon diin nasaksihan ang ilang mga tagsa-tagsa nga talento.

Ang maong kasaulogan gilangkoban sa nagkalain-laing mga tribu sama na lamang sa Tribung Bagobo-klata, Tribung Ata, Tribung Matigsalog, Tribung Obo Manuvu, ug Tribung Bagobo-tagabawa uban sa presensya sa atong IP Director sa Arkidyosis sa Dabaw nga mao si Rev. Fr. Florencio Acedo, Jr. (Sem. Resty J. Cabahug)