Natural family planning method practitioners nagpaambit sa kasinatian

Pipila ka mga magtiayon nga nagagamit og Natural Family Planning Method ang nag-awhag sa mga magtiayon nga mugamit sa maong pamaagi sa pagplano sa ilang pamilya.

Sa gipahigayon nga Family and Life Archdiocesan Assembly, nagpaambit ang unom (6) ka mga magtiayon nga miagi sa training mahitungod sa Billings Ovulation Method, nga maoy gina-promote nga paagi sa Simbahan ug unsa ang mga benepisyo niini sa ilang kinabuhi isip magtiayon ug pamilya.

Gina-awhag usab nila ilabi na ang kadtong wala pa masayod mahitungod niini ug kadtong nagagamit og artificial birth control methods nga muduol sa Family and Life Center sa ilang mga parokya ug sa Archdiocesan Family and Life Center duol sa Our Lady of Fatima Parish aron mahatagan sila og pagpasabot kon training mahitungod niiini.

Kahinumdoman nga nagpahigayon og Natural Family Planning Training ang FLA niadtong milabay’ng tuig diin tulo ka batch sa mga magtiayon gikan sa nagkalain-laing parokya ang mitambong. Didto gihimo ang charting ug training mahitungod sa Billings Ovulation Method.

Sumala ni Fr. Orlando Angelia, Family and Life Apostolate (FLA) Director, bisan pa man nga napasa na ang Reproductive Health Law, padayon gihapon ang Simbahan sa pagtudlo mahitungod sa moralidad ug dignidad sa kinabuhi sa tao.

Ang Family and Life Archdiocesan Assembly gipahigayon sa Stella Maris Academy Gym, July 19. Ang whole day affair nagsubay sa tema nga: “Natural Family Planning: A Way of Life and a Way of Love.” (@johnfrancesf)