Bokasyon Ipadayon, Palamboon ug Saulogon

Puno sa dakong kalipay ug pagpasalamat sa gasa sa bokasyon, gisaulog sa Diyoses sa Tagum ang ika-walo nga ordinasyon sa pagkapari niadtong ika-15 sa Hulyo tuig 2024. Dayag nga makita diha sa mga mata sa mga parokyano sa Our Lady of Assumption Quasi-Parish, Merville, Tagum City ang ilang kalipay tungod sa laing gasa na usab nga ilang nadawat gikan sa Ginoo. Usa ka dakong gasa nga dili kanunay natong masaksihan.

Diha sa pagsaulog sa Santos nga Misa nga gipanguluhan ni Most Rev. Medil Aseo, D.D. obispo sa Tagum, miingon siya nga diha sa Presbyterorum Ordinis atong mabasa kining hamubo apan maundanon nga mensahe nga nag-ingon: “priests are debtors, that the truth of the Gospel which they have may be given to others. Ang usa ka magpari is ‘debtor’ sa ato pa, anaa sa ato ang analogy nga mangutang ta. Duha ra ka butang, … ang nangutang tungod sa iyang dakong tinguha ug paghigugma aron iyang ihalad o itabang. Ikaduha, hibaloi nga ang anaa kanimo adunay tuburan, adunay laing tag-iya, dako nga responsibilidad apan anaa usab ang pagpaubos nga kini gisangon lang usab kanimo…”

Dugang pa niya isip hagit sa bag-ong giordinahan nga “Paningkamoti nga diha sa imong ministriya imohang madala ang maayong balita ngadto sa mga tawo, dili lamang sa mga pinili apan sa tanan. Kahibalo man ta nga sa atong diocese ang ordinasyon usa ka public nga kalihukan… hinaut unta nga sa mga higayon nga imong mabalik lantaw, dili lamang ang imong kaugalingon ang imong hunahunaon apan kining mga tawo nga imong gialagaran, ang mga tawo nga nagmahal kanimo…. Atong mahinumduman nga ang kalig-on ug kamanggihatagon sa mga tawo is more than enough to really remind us of the goodness of God, and will remind us eventually dili lang sa mga kaharuhay labi na sa mga krisis sa umaabot. Ang maong bag-ong inordinahan sa pagkapari mao si Rev. Fr. Mark Lloyd Abedejos, 26 anyos ug sakop sa maong Parokya, kansang pagtubag sa tawag nagsugod sa pagtambong sa mga kalihukan sa Gagmy’ng Kristohanong Katilingban (GKK) ug Parokya labi na diha sa pag-alagad isip usa ka altar server. (Sem. Resty J. Cabahug)