Ang Bunyag ug Paghalad sa Bata!

Nganung sa ubang pundok dako na bunyagan? Sanglit si Kristo dako na gibunyagan ni San Juan Bautista didto sa suba sa Jordan (cf. Mateo 3:13-17),  kini maoy ilang gisunod.

Angay natong sabton nga ang bunyag nga nadawat ni Jesus sa suba sa Jordan dili bunyag nga sama sa atong pagadawaton  nga mao ang pagpapas sa salang panulondon. Si Kristo walay bisan unsa nga klase sa sala ug wala siya nanginahanglan ug kaluwasan. Gani siya mismo ang tuburan sa kaluwasan.

Kadto nga panghitabo sa panahon nga siya nagpabunyag kang San Juan Bautista mao ang ilang pagpadayag sa dakong misteryo nga adunay usa ka Dios diha sa tulo ka Persona nga mao ang Amahan, Anak ug ang Espiritu Santo diin sila mismo ang nagpadayag sa katawhan.

Ang bunyag ni Kristo maoy inugurasyon sa Iyang misyon sa pagluwas kanato. Siya gipamatud-an nga gikahumut-an nga Anak sa Dios Amahan. Ang atong bunyag nagpapas sa sala nga panulondon ug naghimo kanatong mga sakop sa Simbahan, ang lawas ni Kristo.

Ang bata gina-dedicate nila? Ang paghalad ug pagdedicate sa usa ka bata ngadto sa templo,  usa ka balaod ug  pamatasan nga iya sa mga Hudiyo. Sa balaod ni Moises, ang tanang panganay’ng lalaki kinahanglan ihalad. Isip Hudiyo, si Jesus gihalad usab sa iyang mga ginikanan nga si Santa Maria ug San Jose ngadto sa Templo sanglit sa pagkatawo ni Kristo nahisakop pa sila sa maong pamalaud  (cf. Lucas 2: 22-38). Apan angay nga hinumdoman nga ang kasulatan  nag-ingon nga ang “balaod gihatag kang Moises apan ang grasya ug kamatuoran miabot pinaagi kang Hesukristo”(Juan 1:17).

Busa ang paghalad  ug pagdedicate sa bata  usa ka pamalaod  nga gihatag kang Moises nga gisunod sa mga Hudiyo. Apan isip mga Kristiyanos, ang paghalad nga angay pagabuhaton sa bata mao na ang bunyag nga mao ang hingpit ug angay nga paghalad nga pagabuhaton subay sa tudlo ni HesuKristo (cf. Juan 3:3-5, Marcos 16:16).

Sanglit dili naman kita mga Hudiyo kondili mga Kristiyanos naman kita, angay nga magsubay kita sa husto nga pagtulun-an nga iya ni Kristo.

Brod John and Ronald, mabuhay mong duha, si Joey ni sa Tagakpan, Tugbok. God Bless! 09301455….

Salamat Brother Joey, nagbuhat lamang kami sa gisangon sa Ginoo dinhi kanamo pinaagi sa iyang Simbahan nga mao ang pagmantala sa kamatuoran.  Kanunay sa pagsubay ug God Bless pod sa imo.