“Paghigugma sa Hinigugma”

June 8, 2024, adlaw’ng Sabado, nagpahigayon og Pre-cana Seminar ang mga PSKB Parish Team nga gipangulohan sa managtiayon nga sila Mike Melon ug Faith Claire Sevilla nga mao ang PSKB Parish Coordinator. Kauban usab nila ang mga FLA Speakers sa pagpangandam niining maong Seminar dinhi sa San Roque Parish-Malabog. Gisugdan kini sa alas siyete sa buntag nga gitambongan sa 36 ka paresan nga buot magpakasal. Kini usa ka pagpangandam alang sa umaabot nga Kasalan ng Parokya sa umaabot nga Hulyo 20, 2024 aron maangkon ang Sacramento sa Kaminyoon, kay nasayran sa mga PSKB sa matag GKK nga sakop sa simbahan nga aduna pay mga miyembro nga nag-ipon-ipon o nagpuyopuyo, busa naningkamot sila nga makahigayon og Kasalan ng Parokya uban sa pagtugot ni Father Cirilo Bermudez, Parish Administrator, nga mahatagan og pagtagad ang mga nanginahanglan sa maong Sacramento nga walay ikagasto.

Ang pag ipon-ipon usa man ka dakong kalapasan sa kabubut-on sa Dios ug dili maangkon ang grasya nga makasantos. Ang kaminyoon usa ka tawag diha sa pag-alagad sa matag-usa, pagpadayag sa Gugma sa Dios.

Nasugdan ug natapos nga hapsay ang seminar pinaagi sa pagtinabangay sa grupo uban sa giya ni Sis Jeanet ug ni Rev. Junel nga naghatag usab og mensahe sa matinud-anong gugma nga naggikan sa Dios. Malipayon nga nanguli ang mga partisipante nga puno sa kalipay nga dala ang gugma sa matag-usa, nga mas nabati nila ang paghigugma sa ilang hinigugma.

Dalaygon ang Dios!

(Arlene Tarnate | Parish SoCCom)