Parokyanhong Pagbisita sa Magbalantay

“Kumusta na ba ang atong pagtoo?” Mao kini ang usa sa mga sentrong ideya luyo sa nagapadayong Bisita Pastoral sa atong halangdong Arsobispo sa Davao Most. Rev. Romulo G. Valles D.D. sa mga parokya sulod sa arkidyosis. Gipahigayon kaniadtong Hunyo 17 hangtud 19 ang maong pagbisita ni Abp. Muloy ngadto sa parokya sa St. Mary of the Perpetual Rosary Parish Buhangin.

Sa unang adlaw, gisugdan kini sa usa ka motorcade diin nagsugod sa entrance sa Jade Valley. Ang motorcade giduyugan sa Kura Paroko sa St. Mary’s nga si Rev. Fr. Dionisio “Diony” Tabiliran ug usab sa kaniadtong diyakono ug karon pari na nga si Rev. Fr. Angelo Espinas. Daghang mga parokyano ang nag-atang sa kadalanan dala ang ilang mga flaglets ug dako ilang kalipay tungod sa higayon nga makita ang Arsobispo.

Tuod man minaog si Abp. Muloy sa iyang sakyanan ug misulod sa makadiyot sa kapilya sa GKK San Isidro Labrador Juliville. Dako ang kalipay sa Arsobispo tungod sa iyang nakita nga kadako ug kaanindot sa kapilya. Komento pa niya nga kini timaan sa buhing pagtoo sa katilingban.

Adunay Opening Salvo nga giandam ang Parish Youth Ministry diin sila nagsayaw og mga festival dances; human niini mao ang Rite of Reception sa sulod sa Simbahan. Misunod dayon ang kasaulogan sa Santos nga Misa diin sa iyang homiliya iyang gihatagan ug importansiya ang rason sa Pastoral Visit nga “panghimulso” sa katawhan dinhi sa Parokya kung unsa ba kabuhi o kalambo ang pagtuo.

Sa ikaduhang Adlaw sa Bisita Pastoral nahitabo ang Checking of the Canonical Books, Liturgical Vestments and Vessels ug uban pa. Nahitabo usab sa Parish Gym ang Reporting sa mga Coordinators sa matag ministrya diin namati ang Arsobispo ug usab ang mga core group sa matag ministrya. Naghatag sa ilang report ang Worship, Formation, Service, Family and Life, Youth ug Ministry ug usab adunay GKK Report. Adunay open forum diin ang mga katawhan adunay tsansa nga makapaabot sa ilang mga pangutana ngadto sa Arsobispo. Ang facilitator sa program mao ang FLA Coordinator nga si Mr. Maurillo Frias.

Sa katapusan adlaw sa Bisita Pastoral, samtang padulong pa Ang Pastoral Visiting Team ug SMPRP Team sa GKK nga misahan, adunay motorcade gihapon nga nahitabo diin sa ikaduhang higayon didto na sa Cabantian Road kini gihimo.

Sa pagsaulog sa Santos nga Misa gitagaan ug bili ni Abp. Muloy ang papel sa usa ka Arsobispo sa iyang pag-atiman isip magbalantay sa iyang katawhan dinhi sa Archdiocese of Davao. Dugang pa niya daghang mga Santos ang atong Simbahan sama sa patron nga Sta. Teresita sa Batang Jesus nga mamahimong sumbanan sa katawhan sa pagpuyo sa Kinabuhing Kristohanon.

Sa katapusan nagpahayag sa iyang mensahe ang Kura Parokong si Fr. Diony sa iyang pasalamat ngadto sa tanang nangandam ug misuporta sa gihimong Bisita Pastoral ug nagpasalamat usab siya kang Abp. Muloy sa iyang pagduaw sa parokya. Gihatag sa Arsobispo sa katapusang panalangin ug dayon gipanalanginan usab ang mga rosaryohan nga nagsilbing souvenir sa Pastor Visit sa Arsobispo ngadto sa parokya sa St. Mary of the Perpetual Rosary Parish Buhangin. (Allyza Hope Tabigue | St. Mary of the Perpetual Rosary Parish SoCCom)