Tahora ang mensahero sa Ginoo

Ika-14 nga Domingo sa Ordinaryong Panahon (July 7, 2024)
Ez 2:2-5 / Ps 123:1-2, 2, 3-4 / 2 Cor 12:7-10 / Mk 6:1-6

“Ang propeta gitahod sa tanang dapit gawas lang sa iyang kaugalingong lungsod, mga kadugo uga banay.” Kini ang kasinatian sa mga magtutudlo sa Balaang Kasulatan, lakip na kang Kristo sa iyang paghimo’g mga milagro didto mismo sa iyang kaugalingong lungsod.

Wala gitahod si Jesus tungod kay alang kanila siya sama lamang sa usa kanila. Siya ilang silingan, pareho lamang og kahimtang nila. Nasayod sila sa iyang kaagi. Usahay, kita usab dili na maminaw sa tawo nga suod kanato. Dili na kita motuo sa tawo nga kanunay nato nga gikauban. Dili na kita makakitag maayo sa komon kaayo nato sa atong panan-aw. Nagkinahanglan pa ba diay kita og laing tawo nga mosulti kanato sa maayo ug matuod?

Wala gitahod si Jesus tungod kay alang kanila dili katuohan ang iyang paglambo sa kinaadman ug kaalam. Dili nila madawat kung giunsa niya pagkab-ot sa maong naangkon nga abilidad. Usahay, ingon usab kita niini. Bation nato nga hilasan kita sa uban nga milabaw na kanato sa ilang mahimo ug kahimtang. Murag dili nato madawat nga kita nagpabilin sa atong estado ug ang uban milambo. Nagkinahanglan ba gayod diay nga kita kanunay molabaw ug ang uban magpabilin nga ubos kaya kanato?

Wala gitahod si Jesus tungod kay alang kanila natandog ang ilang garbo tungod sa iyang gitudlo ug gibuhat nga mga kamatuoran alang sa kabag-ohan. Dili nila madawat ang ka sakit sa kamatuoran nga gipanulti ni Jesus aron sila mabag-o. Usahay, kita usab mopalayo ug magpabilin nga gahi ang kasing-kasing kung adunay mosulti kanato nga sakit dawaton tungod sa atong nahimong mga pagkulang. Inay mamalandong ug magpasalamat kita sa tambag sa uban aron kita mahilayo sa peligro ug kapildihan, lainon hinuon nato kini pagsabot. Nagkinahanglan pa ba diay nga kita mahiumpawak sa kaalaot usa pa kita motuo sa sakit nga kamatuoran?

Hinaot unta nga madawat nato sa ordinaryo nga ginikanan o higala ang maayong tambag nila alang sa atong kabag-ohan. Molabaw unta ang atong pagtuo ug pagdawat sa mensahe sa Dios bisan pa man sa mga pagkulang sa atong mga lideres ug alagad-pangulo. “Ang propeta gitahod sa tanang dapit gawas lang sa iyang kaugalingong lungsod, mga kadugo uga banay.”