Mabungahon nga Kapistahan sa OMPH

Ang Our Mother of Perpetual Help Parish sa Bajada mas inila nga Redemptorist Church nagsaulog sa ilang ika singkwentay-dos (52) nga Kapistahan niadtong Hunyo 16, 2024 uban sa tema nga “Journeying with Mama Mary in Faith and Service”.

Daghang aktibidades ang nakalinya sa maong kalihokan hangtod sa adlaw sa kapistahan. Unang gisaulog ang siyam ka adlaw nga Novena Mass sugod niadtong Hunyo 7-15, sa alas sais sa buntag (English Mass) ug alas singko y medya sa hapon (Cebuano Mass) nga gisuportahan sa kada sona ug mga ministriya. Pagka Petsa 8, Nagpahigayon ang RYM Davao ug ang mga Local Coordinating Council (LCT) ug programa para sa mga kabataan nga mao ang Youth Day 24 diin isa ka adlaw ang gigahin sa maong kalihokan.

Hunyo 15, Sabado sa alas kwatro sa kadlawon, adunay dawn prosesyon nga nahitabo o AURORA para sa Decor Saints nga sila si St. Alphonsus, St. Gerard Majella, St. Neumann ug ang OMPH Icon nga mao ang sentro sa selebrasyon. Ang rota nagsugod gikan sa parokya dayon Bajada Flyover, Orange Grove Hotel, Santol Street Buhangin, SPMC Bajada ug pabalik sa parokya. Paghuman sa prosesyon gisunod dayon ang Santos nga Misa sa ika 9 nga adlaw sa Novena ug Renewal sa mga GKK Servant Leaders.

Hunyo 16, adlaw’ng Dominggo sa alas dyes gisaulog ang Pontifical Mass ug adlaw sa mga Amahan kon Father’s Day pinangulohan ni Most Rev. Emmanuel Cabajar C.Ss.R., D.D. ug gikonselebrahan sa mga kaparian sa Our Mother of Perpetual Help Parish. Ila sab gihatagan ug special mention ang taga Family and Life Apostolate (FLA) sa pagsaulog sa ilang ika-50 nga anibersaryo.

Ang pinakasadya nga programa sa Fiesta Celebration, nahitabo pagkahapon sa alas kwatro didto sa Redemptorist Gym. Gisugdan una ang registration ug gisundan ug opening salvo sa mga PSK Zumba Girls. Nagwelcome ang Kura Paroko nga si Rev. Fr. Gary R. Alvarado C.S.s.R. sa mga parokyano ug gisunod dayon ang rollcall sa matag Sona ug mga ministriya dayon ang unang batch sa presentasyon. Human sa salo-salo, gisunod ang Marian Cosplay diin walo ka imahe ni Maria ang nagpasundayag sa ilang maanindot nga mga hulagway ug ang nakadaog mao ang Sona 7. Nagparaffle sab sila ug mga Door Prizes ug ang Day Chapel Raffle nga mao ang usa sa main event. Misunod dayon ang Ika-duhang batch sa presentasyon ug gipahibalo na ang nakadaog sa Grand Prize nga 100,000.00 nga mao si Jayson Porlares. Gipresenta ang nakadaog sa Redemptorist Youth Day Mindanao Dance Festival Champion nga mao ang taga Sona 5.

Nagpasalamat sab ang mga kaparian sa tanang GKK Group Servant Leaders ug ministries nga mitabang sa pagpamaligya sa mga tickets para sa pagtukod sa maong Day Chapel.

Nagmalampuson ang maong kalihokan tungod sa mga tawong nagpaluyo niini uban sa atong LGU, pwersa sa kapulisan para sa hapsay nga selebrasyon, uban ang kinatibuk-an nga mga parokyano sa Redemptorist Community nga way puas nagsuporta kanunay sa kalihokan sa atong simbahan.

Viva Maria! Inahan sa Kanunay’ng Panabang!

(Mary Grace P. Gonzales | OMPH SoCCom)