Ayaw kabalaka, salig lang

Ika-13 nga Domingo sa Ordinaryong Panahon (June 30, 2024)
Wis 1:13-15, 2:23-24 / Ps 30:2, 4, 5-6, 11-13 / 2 Cor 8:7-9, 13-15 / Mk 5:21-43

Ang tanang butang sa kalibotan mosunod sa mando sa Dios ug diha Kaniya walay makababag sa iyang plano. Atong nadungog ang duha ka milagrosong pagkaalim sa duha ka mga babaye. Ang una niini mao ang babaye nga gitalinug-an sulod sa napulog-duha ka tuig. Siya nag-antus sulod sa taas nga panahon ug gani daghang mga batid sa pagpang-ayo ang iyang giduolan, apan misamot pa hinoon ang iyang pag-antus. Siya nga adunay dakong pagtoo sa atong Ginoo ug iya kining gipamatud-an sa buhat pinaagi sa iyang paghikap sa sidsid sa saput sa atong Ginoo. Ang iyang dakong pagtoo naghatod kaniya sa buhat. Kini nga kamatuoran nga atong dakong pagtoo sa Dios maghatod unta kanato sa paghikap sa Dios. Dili lamang magpabilin ang atong pagtoo diha sa atong kaugalingon apan kini mohatod kanato sa paghikap sa Dios aron ang iyang pagpang-ayo masinati nato diha sa atong kinabuhi sama sa babaye nga nag-antus sa taas nga panahon.

Ang ikaduha niini mao ang babaye nga anak ni Jairus usa ka opisyal sa sinagoga. Siya nagahangyo sa atong Ginoo nga iyang adtoon sa ila ang iyang nasakit nga anak aron ayohon apan tungod sa kadaghan sa tawo ug sa nahitabo sa babaye nga nag-antus sulod sa napulog-duha ka tuig, ang atong Ginoo daw nalangan sa pag-abot didto sa balay sa opisyal. Diha sa maong hitabo adunay babag nga tungod niini adunay tawo nga nagtaho kanila nga patay na ang bata og dili na samokon ang Ginoo. Apan ang Ginoo nag-ingon “Ayaw kabalaka, salig lang” kini nga mga pulong sa atong Ginoo mao kini ang atong huptan kanunay sa atong kinabuhi. Bisan adunay mga babag diha sa dalan paingon ngadto sa kaayohan, apan atong hinumdoman ang pasalig sa Ginoo kay siya lamang ang nagbuot sa tanan. Bisan diha sa bung-aw sa kamatayon ang Ginoo adunay gahom niini. Walay makababag sa plano sa Dios diha kanato bisan daw sa mga mata sa tawo kini katingalahan.

Sa katapusan, ang Ginoo nagpadayag sa iyang gahom batok diha sa sakit ug bisan diha sa baba sa kamatayon. Siya nga maoy nagbuot sa tanan ug ang iyang plano maoy matuman bisan tuod nga daw adunay babag ug nakapalangan sa pagtuman niini apan diha sa Dios walay babag ug ang tanan posible. Amen. (Rev. Soren Abellanosa)