Bulak Ug Bulan Sa Mayo: Paghalad Kang Birhen Maria

Ang Flores de Maria nailhan nga “Flores de Mayo” o “Bulak sa Mayo”, usa ka tradisyonal ug debosyon nga gisaulog sa Pilipinas sa bulan sa Mayo. Kini nga makalingaw nga kalihukan ug kadungganan sa Mahal nga Birhen Maria, ang Inahan ni Jesus, pinaagi sa mga pag-ampo, prosesyon, paghalad og mga bulak ug mga alawiton alang kang Birhen Maria. Ang parokya sa St. Mary of the Perpetual Rosary nagpahigayon niining kalihukan sulod sa GKK nga nahisakop niini.

Tungod kay aduna pay klase ang mga kabataan, ginahimo kini matag Sabado ug Dominggo sa lain-laing katilingban uban sa mga katekista. Adunay hamubong mga katekesis sa mga bata mahitungod kang Birhen Maria sama sa unsaon pag-ampo sa Santos nga Rosaryo, nagkalain-laing mga alawiton isip pagdayeg sa Dios ug ang dakong importansya sa papel ni Maria sa atong kaluwasan.

Mayo 31, 2024, gipahigayon ang pagtak-op sa Flores de Mayo mismo. Sa buntag gisugdan kini sa pag-ampo sa Santos nga Rosaryo sa mga katekista uban sa mga kabataan sulod sa Simbahan, ug ang paghalad sa letra sa Ave Maria samtang ginaawit ang “Maria, babaye sa pagtoo”. Naghalad usab og mga bulak ngadto kang Birhen Maria samtang ginaawit ang “Daygon ta si Maria.”

Misunod ang Santos nga Misa nga gipangulohan ni Rev. Fr. Dionisio “Diony” Tabiliran, diin gisaulog ang kapistahan sa Pagduaw ni Santa Maria Birhen ngadto sa iyang paryenti nga si Santa Isabel. Si Birhen Maria, inubanan sa iyang kabulahanan tungod sa pagpili kaniya isip Inahan sa Manunubos, nagpaambit niini ngadto kang Santa Isabel. Ang pagduaw niya nangahulogan sa pagdala niya kang Jesus ngadto sa katawhan nga nanginahanglan sa kaluwasan.

Misunod dayon ang Parlor Games alang sa mga kabataan nga malipayong miapil sa mga ginaandam nga mga padula. Gihuman ang mga kalihukan pinaagi sa salo-salo alang sa tanan.

Pagkahapon gisugdan ang Santacruzan o Sagala pinaagi sa pag-ampo ug pag-awit sa Lupang Hinirang. Mihatag si Sis. Dionisia Devera, PSP Head Catechist sa St. Mary Parish sa iyang Welcome Address. Adunay intermission number ang mga Pangulo sa Pagpanudlo o Katekista. Sa Santacruzan gihandom ang pagkakaplag ni Rayna Elena sa Balaang Krus.

Human sa presentasyon sa mga Rayna sa Santacruzan, giawit ang “O Maria, Rayna sa Pilipinas” pasidungog kang Birhen Maria, hamubong pagprusisyon sa Imahe ni Santa Maria inubanan sa mga Rayna sa Santacruzan.

Malipayon ug malampuson kining maong kalihukan tungod sa pagkugi sa mga katekista, partisipasyon sa mga kabataan, suporta sa mga ginikanan ug GSLs sa parokya ilabina sa tanan tungod sa nagpasiugda sa pagpasidungog, nagpalig-on sa atong pagtoo ug giya ni Santa Maria nga Inahan natong tanan ug sa grasya sa atong Ginoo.

AVE MARIA!

(Ralph Louie “RL” Flores Young, GKK SoCCom)