Nagkahiusang Piniyalan uban ni San Isidro Labrador

Mayo 24, 2024 adlaw’ng Biyernes gisaulog ang ika-28 ka tuig nga kapistahan sa hamiling Patron San Isidro Labrador dinhi sa Gagmay’ng Kristohanong Katilingban (GKK) San Isidro Labrador, Ciudad de Esperanza, Cabantian. Adunay Santos nga Misa sa alas otso sa buntag nga pinangulohan ni Rev. Fr. Boy Roland Ong inubanan ni Rev. Fr. Ritsche Gamaya.

Ang mga pagbasa nakapatandog kanamo ilabina sa pagpaambit ni Fr. Ong sa tema nga nagkanayon: “Nagkahiusang piniyalan uban ni San Isidro Labrador nga masaligon ug matoohon sa dakong gugma sa Dios.” Ang paglawig isip piniyalan dawaton ug pangandaman, dili kini sayon kay maga-uban kanato ang mga pagsulay niining kalibutan. Si San Isidro Labrador atong modelo diin ang mga hiyas ug binuhatan nga iyang naangkon talagsaon nga gipadayag sa Ginoo alang kanatong mga piniyalan nga hinaot atong pagahuptan. Mapasalamaton kami Kanimo Santos nga Halangdon.

Ang kapistahan napuno sa kalipay ug kadasig ilabina sa Live Coverage sa DXGN 89.9 Spirit FM-Davao panahon sa Santos nga Misa, daghang ngpaambit sa pag-apil niini. Ang han-ay sa mga programa naghatag usab ug kalipay sa Visitation of Elderly nga gipangulohan sa mga Pangulo Sa Batan-on, mga GKK Servant Leaders ug mga miyembro sa paghatag ug pagpaambit sa mga grasya diin mapadayonon kini ilabina sa mga sponsors ug mission partners.

Mapasalamaton kami sa among Kura Paroko sa St. Mary of the Perpetual Rosary Parish, Rev. Fr. Dionisio Tabiliran sa suporta ug paggiya kanamo ug sa tanang kaigsoonan nga nagkahiusang naga-ampo niining kapistahan. Dalaygon ang Dios sa kahangturan.

Viva! San Isidro Labrador!

(Maria Dexie Calvo, GKK SoCCom)