Katilingban nga nagkahiusa

‘Katilingbang masaksihon, katilingbang maampoon, katilingbang nag-alagad, kini ang GKK’ sigon pa sa kanta nga Awit sa GKK.

Gipahigayon sa parokya sa San Pablo ang GSL Day niadtong Mayo 30, 2024 isip kabahin sa programa ug selebrasyon sa ika-75 ka tuig nga kasaulogan sa Archdiocese sa Davao diin adunay kalambigitan ang mga Gagmayng Kristohanong Katilingban sa maong kalihukan. Gisaulog usab sa parokya ang Paghandom sa Dedikasyon sa maong Simbahan sulod sa 34 ka katuigan. Ang panagtapok gilangkuban sa mga GKK Sevant Leaders sa 59 ka GKK sa maong parokya.

Gisugdan ang maong selebrasyon pinaagi sa Santos nga Misa diin gipangulohan sa Kura Paroko nga si Reberendo Padre Allan Rodriguez, sa homilya gipaambit sa Resident Deacon nga si Reberendo Ritzchild John Cariaga kung unsa ba ang pasabot sa Dedication of the Church “Karon maghisgot ko, bahin sa dedikasyon sa simbahan… dili ni sya gi-tawag nga foundation of the church sa San Pablo kondili THE DEDICATION of the CHURCH, dako kaayo ni sya nga selebrasyon sa simbahan,” sigon pa sa reberendo nga dili tanan simbahan sa Archdiocese sa Davao nagdedicate kay anaa diay kini mga rekisitos sa pagtugot nga ang maong simbahan ma-dedicate.

Namugna ang parokya sa San Pablo niadtong 1982 ug walo ka tuig ang milabay mao ang pagdedicate niini tuig 1990 nga gipanguluhan ni anhing + Most. Rev. Charles Van den Ouwelant MSC D.D. kanhing Obispo sa Dyosesis sa Surigao. Sa pagpadayon sa pagpaambit ni Reb. Ritzchild, nga ang maong dedikasyon sama sa pagbunyag sa usa ka bata, gipasabot usab niya nga ang dose ka mga haligi ug ang altar sa maong gambalay gidihugan sa lana sa Krisma nga sama sa atong bunyag o kumpirma nga kita gidihugan usab. “Pinaagi sa pagdedicate sa Simbahan kini nagpakita nga kining istruktura iya gayud sa Ginoo, and it is a sacred place of God,” dugang pa niya sa unang bahin sa iyang homiliya.

Sa pagpadayon sa maong kasaulogan diha sulod sa Santos nga Misa gipalawman usab sa maong reberendo ang kabilihon isip GSL. “You are Leaders, mga lideres kamo nga PINILI, GIPILI ARON MUTABANG SA KURA PAROKO SA PAGDUMALA SA SIMBAHAN UG SA MGA GKK, MUTABANG SA KURA PAROKO UG DILI MAGBUOT-BUOT SA KURA PAROKO,” pagpadayon pa niya sa iyang homiliya. Gipasabot usab niya kung unsa ba ang gi-tawag nga SERVANT LEADER.

Gipahinumduman usab niya nga danihon padulong sa simbahan ang katawhan ug dili ipahilayo ug puy-an ang pagkamaloloy-on sama ni Kristo ug mamahimong buhing saksi diha sa atong pagtoo. Tapos sa Santos nga Misa mi sunod gilayon ang solo-salo diin giambitan sa tanan nga mga GSL ang giandam sa parokya, unya pagkahuman adunay hamubo nga programa diin gihatagan ug pasidungog ang mga GSL pinaagi sa paghatag ug sirtipiko agig pasidungog sa ilang kinasing-kasing nga pagdawat isip piniyalan sa ilang nagkalain-laing mga katilingban. Sa wala pa matapos ang selebrasyon sa maong okasyon, mapasalamaton si Reberendo Padre Allan Rodriguez sa makanunayong pagtubag nga maabtikon ug sa way pagduha-duha sa matag katilingban sa panahon nga ang parokya adunay programa o kalihukan alang sa katawhan. “NAGLAWIG TA AS SERVANT LEADERS UG DILI MGA SOCIAL WORKERS TUNGOD KAY SI KRISTO ANG SUKARAN SA TANAN, SA ATONG PAGPANIBERSYO,” pamulong ni Fr. Allan una pa man ma tapos ang programa nianang gabhiuna. (Lord Brian Origenes – San Pablo Parish SoCCom)