Simbahan: Santos Ug Makasasala

Ikanapulo’g Unom nga Domingo
Sa Ordinaryong Panahon
Kaalam 12:13, 16-19/ Ps. 86:5-6, 9-10, 15-16/ Rom. 8:26-27/ Mt. 13:24-43

Kung ang Ginoo gamhanan, nganu man nga ang mga dautan nagpadayon man nga midaghan? Kung ang Ginoo mahigugmaon nganu man nga gitugotan niya nga mag-antus ang nagbinuotan ug ni-asenso hinuon ang nagbinuang?

Diha sa Ebanghelyo gipahimangnuan kita nga, una, ang Ginoo puno sa pasensiya. Sayod Siya nga ang mga tawong mainampuon usahay garboso; ang mga manggihatagon usahay mangilkil sa butang nga dili ila; ang tawong hinimbahon makasala usab. Kung sa kanta pa “santong kabayo, banal na aso.” Apan ang Ginoo puno sa pasensiya, nakakita nga bisan sa pagkamakasasala sa tawo moabot ang panahon nga siya mabag-o. Kinahanglan lamang nga hatagan siya’g higayon ug dili una ibton aron siya mismo makaamgo nga mobalik sa Ginoo.

Ikaduha, ang makanunayong pagtudlo sa maayo dungganon nga tawag bisan sa dili dayon makita nga positibong tubag ug resulta. Ang Simbahan hangtod karon padayon nga nagwali ug wala maluya bisan dunay eskandalo ug kakulang sa mga Obispo, kaparian, ug mga lideres nga layko. Ang mga eskwelahan padayon sa pag-edukar bisan pa man usahay dili makontrolar ang mga kabataan tungod sa media, internet ug uban pang kahilayan. Ang mga ginikanan padayon pagmaymay ug pagtambag uban sa paningkamut sa ilang ehemplo bisan pa man dili masabtan sa ilang mga anak nga nagtubo.

Ikatulo, sulod sa tagsa-tagsa kanato ang kaayo taliwala sa atong mga kahuyang. Sayod kita nga usahay mabugnaw kita sa pagkumpisal kay makasala man gihapon; mohunong kita pagsimba kay dunay mga silingan nga dili nato hiuyonan. Apan sayod ang Dios nga bisan sa atong kamakasasala Siya magmadaugon dinhi kanato kay moabot nga kita mobunga gihapon sa kaayo sa kasing-kasing.

Busa dili kita mohunong pag-ugmad sa yuta sa atong pagtuo. Palambuon ta ang atong kaayo taliwala sa mga sagbot sa atong tawhanong kahuyang.