FLORES, kagahapon hangtod karon

Kasinatian ni Dennis Dollete, Jr. usa ka batan-on nga karon usa na sa nagpahigayon sa Flores de Mayo

Usa sa mga tradisyon natong mga Pilipino mao ang usa ka bulan nga debosyon sa Mahal nga Birhen Maria ug kini mao ang Flores de Mayo.

Ang Flores de Mayo mao ang panahon diin atong pasidunggan ang Mahal nga Birheng Maria Inahan ni Jesus ug atong inahan pinaagi sa paghalad kaniya sa mga bulak, ug paghalad kaniya sa mga awit nga sa iya nagpahimuot.

Isip usa ka Katoliko naagian ko usab ang Flores de Mayo sa akong pagkabata. Ang among kapilya natukod tungod sa Debosyon sa Flores de Mayo ug ang among paagi sa Flores mao ang paagi sa Antique nga gidala sa among mga katigulangan. Sauna, paghinapos na ang Abril, excited kaau mi nga mga bata kay hapit napod mag Flores. Pag-abot sa Mayo 1 malipay na gyud mi kay pagkagabii magsugod na kini. Usa sa mga nakapalingaw sa Flores mao ang pagkuha ug bulak. Alas dose palang sa udto, manglakaw nami sa akong mga higala aron sa pagkuha ug bulak ug bisan asa mi makaabot og kinuha. Makahimuot tungod ang mga tanom nga gikuhaan maupaw nalang tungod kinahanglan daghan gyud ug bulak ug siguraduhon gyud ug kuha ang Santan aron himoong korona ug kwentas sa Birhen.

Luyo sa kainit usahay naa pagyuy panahon nga gukuron mi ug iro unya paunhanay ug dagan aron dili mapaakan, mangahulog sa kanal kay gusto gyud daghan ug bulak nga makuha tungod magtandiay sa mga bulak ug kinahanglan nga mulabaw ang kagwapa sa among ihalad sa Birhen. Alas syete sa gabii, magsugod ang Flores, alas singko palang busy na sa pag-andam sa altar sa naka toka ana nga adlaw tungod matag adlaw lahi-lahi man ang naka assign.

Sa akong mahinumdoman walay edad nga ginapili daghan kaau mi musalmot sa Flores sauna. Ang mga gwapo’g tingog itapad gyud sa mananabtan. Ako dili ipatapad apan mas kusog kog tingog kaysa sa ila bisan yabag ko, hitabo nga mura napod kog mangantahay sa among Flores.

Usa pud sa akong dili makalimtan ang bibo kaayo nga matag koros sa kanta magsabwag ug bulak ug sa tunga-tunga nga stanza mao na ang pagkorona, dunay usa ka bata nga muadto sa altar nga magdala sa korona unya mukanta siya, “batunan mo Señora ining amon amoma malab-as nga Korona tipan sang amon gugma”

Sa pagka-karon isip usa na sa mga batan-on ug mananabtan nga nagauban sa mga kabataan sa Flores de Mayo nagahandom ako nga masinati pa unta sa mga kabataan karon kining maanindot nga tradisyon luyo sa kasaba ug kagubot sa kalibutan. Makita unta nila ang Ginoo ug ang Mahal nga Inahan sa Dios pinaagi sa Flores de Mayo.

Dalaygon ang Dios ug ang Birheng Maria! (Denis Dollete, Jr.)