Pasalamat sa grasyang nadawat!

Masadyaon ug mabungahon nga pagsaulog sa ika-31 ka tuig nga Kapistahan ni San Isidro Labrador sa parokya sa Lumondao, Marilog District Davao City niadtong Mayo 15, 2023. Gisugdan ang maong selebrasyon sa unang misa nga gipangulohan ni Rev. Fr. Marvin Del Campo uban ni Rev. Fr. Edsel Paloma kanhing kura paroko sa SILP. Misunod ang Pontifical Mass nga gipangulohan sa atong halangdong Arsobispo sa Davao, si Most Rev. Romulo G. Valles, D.D., uban sa mga nagkonselebrar nga mga kaparian, mga diakono ug mga seminarista. Gitambongan kini sa mga pangulo ug mga miyembro sa 50 ka mga GKK sa Parokya ni San Isidro.

Diha sa homiliya sa atong Arsobispo, iyahang gipunting ang tulo ka punto nga nindot kaayo mapamalandongan subay sa pagsaulog sa kapistahan ni San Isidro. Una na diha ang kalipay sa panagtigom sa kapistahan, nga sumala pa kaniya si San Isidro aktibo nga tigsimba sayo sa buntag ug siya nalipay nga ang katawhan nagkatigom aron pagsaulog ug pagpasidungog sa iyang kapistahan. Gipunting usab ang hagit sa pag-atiman sa mga gasa ug mga hatag ilabina ang atong kinaiyahan, kahanginan, katubigan, ug kayutaan. Usa kini ka timaan sa larawan sa kaanindot sa Dios ug pagpangga sa Dios kanato.

Duol sa hagit, giawhag nga mamahimong modelo sa pag-atiman sa atong kinaiyahan tungod kay kini dakong gasa sa Dios. Unta, ang mga taga Lumondao mga modelo ug mga maayong tig-atiman tungod kay abunda sa mga kayutaan ug halos sa mga pangulo ug miyembro kay mga mag-uuma. Dugang niini, unta kita mamahimong usa ka katawhan nga suod sa Dios tungod kay malaumon si Jesus nga kanunay unta kita nga magtinabangay sa pag-apil sa mga kalihukan sa atong simbahan. Kita mga pinalanggang pinili sa Dios busa hagit diha sa GKK nga adunay panagdait ug kahiusa sa tanang miyembro. Hinaot nga ato kining mapuy-an aron mas abli kita sa sitwasyon sa atong katilingban, nga walay pinili. Aduna kita’y pakigsandurot sa uban, ang atong mga pagsulay sa kinabuhi dili makababag kanato sa pagtabang sa uban ug pagpaambit sa atong grasya, bisan man sa ginagmay nga paagi. Subay sa kampanyang synodality, kita magpuyo uban sa atong mga silingan.

Human sa misa, misunod dayun ang pag-inambitay sa grasya pinaagi sa mga handa sa lamesa. Dayun adunay programa nga misunod ug gisal-otan pod niini ang basketball exhibition game sa atong mga kaparian sa Davao kontra sa Lolo Boss uban nga mga piniling mga Pangulo sa GKK. Matag human sa kwarter, sal-otan sa mga pasundayag nga gikan sa mga pangulo ang mga nagkalain-laing Folk Dances sa atong nasud.

Ang laban tali sa mga kaparian ug pangulo natapos sa five-quarter game sa iskor na 125-125 ug misunod na dayun ang awarding ug closing program.

Natapos ang kapistahan ni San Isidro nga puno sa pagmaya, kahiusa, ug pagpasalamat sa grasyang nadawat gikan sa Ginoo. (Honey Kaye Etdang – SoCCom)