Buhing Simbahan

Adlawng Lunes, petsa 20 sa bulan sa Mayo, 2024 gisugat sa mga estudyante sa Baguio National School of Arts and Trade ang atong halangdong Arsobispo sa Davao nga si Most Rev. Romulo G. Valles, D.D. alang sa unang adlaw sa Bisita Pastoral sa Parokya sa San Pedro Calungsod didto sa Baguio. Mapailubong nagpaabot ang mga estudyante apil ang ilang mga maestra ug school heads, dili lamang tungod ang parokya usa sa mga stakeholder sa maong eskwelahan apan tungod sa kahinam sa mga katawhan nga mahimamat ang Arsobispo.

Kauban sa banda ug pipila ka mga opisyales sa barangay, gisugat sa Kura nga si Reberendo Padre Elvie Bordios ang Arsobispo gawas sa luna sa simbahan. Matapos ang paghalok sa krus, gisunod dayon ang Santos nga Misa.

Sa homiliya ni Arsobispo Valles, siya mihatag sa iyang hamubo apan puno nga pamalandong. Iyang giuna ang pagsaysay sa tumong niining Bisita Pastoral ug gipunting nga kini dili ingon nga mag inspeksyon sa mga katikaran o pagdumala sa simbahan kondili ang paghimulso sa mga katawhan ug sa kinabuhi sa parokya. Makahuloganon ang unang adlaw tungod kini usab kapistahan sa Mahal nga Inahan, Birhen Maria isip inahan sa simbahan. Hagit ni Arsobispo Valles nga ang mga parokyano makaangkon sa mga mithi ni Sta. Maria isip mga maantuson nga sumusunod ni Kristo. Nanghinaot siya diha sa atong pagpas-an sa atong mga krus sa dalan sa kahingpitan.

Sakto nga natapos ang Santos nga Misa, mibundak ang makusog nga ulan, hinungdan nga gikinahanglan nga bag-uhon ang pipila sa mga giandam nga mga pasundayag alang niining Bisita Pastoral. Pipila sa mga miyembro sa komitiba sa pagpangandam ang nabalaka diha sa mga panghitabo apan nagpadayon sa pagbarog. Pipila sa mga parokyano labi na ang mga kabatan-onan ang nabasa gayud sa ulan apan sila nagtinabangay gihapon ug plastar sa mga bangko ug lamisa aron ang tanan makakaon sa panihapon.

Matapos ang panihapon, gisunod ang pakighinabi sa mga GSLs sa 20 ka Gagmay’ng Kristohanong Katilingban ilawom sa parokya. Pipila kanila ang nagpaambit sa mga kasinatian ug nangutana sa mga gikalibgan nga mga pamaagi. Usa na diri ang pangutana mahitungod sa pagka-aktibo sa mga miyembro nga dili kanunay. Kini gitubag ni Arsobispo Valles sa pagkanindot nga paagi, sumala pa niya, “ikaw ang mangita.” Kini nga linya nagpasabot nga ang tanang mga binunyagan kabahin sa simbahan ug dili lamang kadtong nagpamiyembro diha sa GKK. Tuod man dakong hagit sa mga piniyalan kining pagtungha-wala sa mga miyembro apan kabahin kini sa sangon nga ilang gidawat sa ilang pagpanaad.

Dugang pa sa unang hagit sa atong magbalantay, siya mipaambit nga unta, ang gasa sa pagtoo atong ipresentar sa tanan, nga unta makita sa mga tawo labi na sa kabatan-onan ang malipayong mga dagway sa mga GSL sulod sa ilang pagpangalagad; nga ang mga katawhan sa Dios, makabati sa iyang dakong gugma.

Sa katapusan, dakong pasalamat sa Arsobispo sa mga GSL nga mitambong, migahin sa ilang panahon bisan sa lawom nga kagabhion ug makusog nga ulan. Dugang pa niya, siya nahagit tungod sa pagpakita sa pagmahal sa simbahan, kay sa ingon, kining mga tawhana wala gani’y sweldo o bisan allowance apan sila nagpabilin ug kini nagtimaan nga BUHI ANG SIMBAHAN!