Eyukaristiya: Ekstensyon sa pagkatawo sa atong Ginoo

Solemnidad sa Balaan nga Lawas ug Dugo ni Kristo (June 2, 2024)
Ex 24:3-8 / Ps 116:12-13, 15-16, 17-18 / Heb 9:11-15 / Mk 14:12-16, 22-26

Ang pagsaulog sa Solemnidad sa balaan nga lawas ug dugo ni Kristo usa ka pagtimaan sa dakong paghigugma sa Dios diha kanato nga diin siya mihatag sa iyang kaugalingon diha sa bayhon sa pan ug bino nga mahimong iyang lawas ug dugo. Ang Eukaristiya usa ka pultahan nga diin atong mahimamat ang langit ug yuta nga managtagbo. Si Jesus ang pan sa kinabuhi nga nanaog gikan sa langit ug nahimong atong kalan-on diha sa panaw. Kita iyang giubanan sa atong panaw niining kalibutan aron sa pagsulod sa gingharian sa Dios nga iyang giandam alang kanatong tanan.

Ang pultahan nga nag-ulang tali sa gawas ug sa sulod. Kini naghulagway sa duha ka kalibutan. Maingon nga ang atong Ginoo: siya usa ka Dios ug tawo ug ang iyang presensiya diha sa Eukaristiya usa ka pagpadayag sa makita ug dili makita nga kalibutan.

Diha sa Ebanghelyo ni San Marcos gipadayag ni Jesus nga sa gabii nga sila nangaon mikuha siya og pan, iyang gipanalanginan ug gipikas-pikas ug gihatag ngadto sa iyang mga tinun-an ug miingon dawata kini kay kini ang akong lawas ug iyang gikuha ang kalis gihatag sa iyang mga tinun-an ug miingon mao kini ang akong dugo sa kasabutan, ato kining madungog sa matag apil nato sa Santos nga Misa. Ang pari naggunit sa gikonsagrahang hostia og moingon mao kini ang kordero sa Dios nga nagawagtang sa mga sala sa kalibutan. Ang dili makita nga Dios nahimong dayag diha kanato. Kita gi-awhag sa paglantaw sa atong Ginoo. Sa dihang ang atong Ginoo natawo sa kalibutan ang iyang pagka-Dios dili dayag diha kanato apan ang iyang pagkatawo maoy atong nakita. Diha sa Eukaristiya ang iyang pagka-Dios ug ang iyang pagkatawo natago diha sa bayhon sa pan ug bino. Sa samang pagka-agi ang mga mata sa atong pagtoo nagtangtang sa tabon aron makita nato ang dili makita nga Dios. Kini usa ka pagtilaw sa langitnong kamatuoran.

Sa katapusan, ang atong pagtoo maghatod unta diha sa atong kaabli aron atong masinati sa tinuoray gayod ang Dios diha sa atong kinabuhi. Si San Pablo diha sa iyang sulat sa taga-Efeso nagkanayon “nagisi ang tabil nga nag-ulang tali sa Dios ug sa tawo. Sa dihang ang atong Ginoo namatay sa krus nagisi ang tabil sa templo gikan sa taas paingon sa ubos. Giablihan sa atong Ginoo ang pultahan aron makaduol kita sa Dios. Sa matag higayon nga kita modawat kaniya diha sa Eukaristiya atong hinumdoman ang mga misteryo nga gihimo sa Dios diha sa atong kinabuhi.

Amen.

(Rev. Soren Abellanosa)