PSL Team Building Gipahigayon, Pagpalig-on sa Pagserbisyo sa Liturhiya

Ang Pangulo sa Liturhiya (PSL) nagpahigayon og duha ka adlaw nga team building, usa ka kalihokan aron mapalig-on ang relasyon sa isigkatawo ug mapalawman ang relasyon ngadto sa Dios. Napahigayon kini niadtong Mayo 17-18, 2024, uban sa tema: “Ang Liturhiya diha sa Sinodong Pagpanaw sa Simbahan” sa Oasis of Peace Beach Resort, Island Garden City of Samal. Ang maong aktibidad gitambongan sa 24 ka mga miyembro sa Pangulo sa Liturhiya gikan sa nagkalain-laing Gagmay’ng Kristohanong Katilingban sa Parokya sa Sacred Heart of Jesus-Obrero.

Ang tumong sa maong team building mao ang pagpaglig-on sa pagserbisyo sa matag PSL nga mao ang magsasangyaw sa pulong sa Dios ngadto sa ilang matag katilingban. Kabahin usab sa maong tumong ang pagpalig-on sa relasyon sa matag-usa nga adunay panagsinabtanay, ug mamahimog maayong modelo sa usa ka tinuod nga Kristiyano sa pamilya ug sa uban. Ang matag-usa nagpadayag sa ilang tagsa-tagsa ka mga kalipay ug mga suliran dinha sa ilang pagpangalagad isip Pangulo sa Liturhiya nga kabahin sa sinodong panaw ngadto sa simbahan. Sila nagkanayon nga adunay mga pagsulay nga ilang natagamtam sama sa mga hagit nga adunay kalambigitan sa pinansiyal, pagpaningkamot nga madala ang ilang pamilya dinha sa pagsimba, ug hilabi na sa pag-awhag sa mga katawhan sa komunidad sa pagtambong sa senimanang Kasaulogan sa Pulong o KSP. Apan luyo sa pagsulay, sila misaad nga mopadayon sa pagsangyaw sa maayong balita sa uban ug mapadayonong moalagad sa simbahan bisan paman sa mga pagsulay nga ilang matagamtaman, sa hugot nga pagtoo ug pagsalig nga ang Dios kanunay mag uban kanila.

Ang unang adlaw sa maong panagtapok gisugdan ug unsa ka pormasyon mahitungod sa “Liturhiya diha sa sinodong pagpanaw sa simbahan” ni Bro. Henry L. Evangelista, ang Parish Pastoral Council Coordinator sa parokya isip mamumulong niadtong tungura. Ang maong pormasyon nagpunting mahitungod sa sinodong pagpanaw sa simbahan. Kabahin usab sa iyang gipaambit nga tungod sila gigasahan man sa Dios sa tagsa-tagsa ka mga talento, panahon ug bahandi ang tanan kinahanglan mahimong matinud-anong nga mopa-ambit sa ilang gasa ngadto sa uban.

Ug sa katapusang adlaw sa team building ang tanan nagkahiusa dinha sa pag-ampo sa Lectio Divina ug misunod ang lain-laing kalihokan ug mga dula nga gipasayon nila Sis Angelica Bermoro ug Justine Kay Delgado. Ang tumong niini, mao ang pagpalambo sa ilang relasyon sa usag-usa. Ug mo-awhag kanila nga kinahanglan ang pagpaminaway ug kahiusahan. Ang tanan malipayong miapil ug nakigbonding sa mga kauban ug labaw sa tanan sila daghang nadala nga mga pagtulun-an nga ilang mapaambit sa ilang tagsa-tagsa ka gialagaran nga mga katilingban isip nga mga Pangulo sa Liturhiya nga nagpanaw isip usa ka simbahan ug kining tanan alang sa paghimaya sa Dios Amahan. (Angelica Bermoro)