Bulak ug Pag-alagad Halad Kang Maria

Matag bulan sa Mayo ginasaulog sa tibuok Pilipinas ang Flores de Mayo kung sa ato pa Bulak sa Mayo. Kini gibuhat isip pahinungod sa atong Mahal nga Inahan, Birhen Maria. Mahinumdunam usab nga niining bulana pagatapukon ang mga kabataan sa ilang tagsa-tagsa nga katilingban diin sila makadawat og Katesismo mahitungod sa atong Inahan, kang Jesus atong Manunubos ug uban pang pagtulun-an sa Simbahan.

Duyog niining maong kasaulogan, kaniadtong Dominggo Abril 28, 2024, pormal nga giablihan sa Parokya sa St. Mary of the Perpetual Rosary ang Flores de Mayo. Kini gihimo sulod sa Santos nga Misa sa alas 3:30 sa hapon. Samtang nagaawit ang katawhan ug “Daygon ta, Daygon ta, Daygon ta si Maria”, ang mga letra sa Ave Maria inubanan sa mga bulak gihalad sa mga kabataan gikan sa Sona 1 hangtud 10 isip pahinungod kang Birhen Maria.

Sulod usab niining Santos nga Misa gihimo ang pagpadala o “sending forth” sa mga chapel catechists na magpahigayon sa Flores de Mayo sa ilang tagsa-tagsa nga katilingban. Ang mga katekista gipresentar ni Ma’am Dionisia Devera, Head Catechist ngadto sa presensiya sa Kura Paroko nga si Rev. Fr. Dionisio “Diony” Tabiliran. Human sa akto sa panaad nga gihimo sa mga katekista, gipanalanginan sila ni Fr. Diony ug dayon gidawat sa katawhan uban sa masibang palakpak.

Makahuluganon ang gihimong kasaulogan tungod kay nagpakita lamang kini na sulod niining bulan sa Mayo dili lamang ang mga kabataan ang angayang mangandam alang sa mga pagtulun-an kundi usab ang ilang mga magtutudlo o katekista. Nagpasabot kini nga ang gugma sa atong Mahal nga Inahan para sa tanan, ma bata man o hamtong. Siya padayon nga anaa ug abli ang iyang mga kamot aron sa pag-agak kanato ngadto sa iyang anak nga si Jesus.

Ang gihimong Launching sa Flores de Mayo ug Sending Forth sa mga Chapel Catechist nagpakita na niining Bulan sa Mayo nga pahinungod kang Maria, dili lamang bulak ang atong mahalad kundi lakip na usab ang atong kinasing-kasing nga pag-alagad ug paghatag sa atong matam-is nga Oo ngadto sa pagserbisyo sa Simbahan. Usa kini ka maanindot nga larawan sa diwa sa kahiusahan diha sa pagpakita sa atong pagtahod ug gugma ngadto ni Santa Maria nga atong Inahan. (Allyza Hope Tabigue, GKK SoCCom)