Pinasahing Selebrasyon sa Kapistahan sa Queen of Peace GKK

“Giniyahan sa Kristohanong pagpakabana dalan sa katilingbanong panaghiusa uban ni Santa Maria”. Mao kini ang tema sa ika-20 ka tuig nga kapistahan sa Queen of Peace GKK sulod sa Parokya sa Our Lady of Lourdes, Bangkal, Davao City.

Niadtong Mayo 11, 2024, malipayon ug madasigong gi-selebrar sa Queen of Peace GKK ang ilang duha (2) ka dekada o baynte (20) ka tuig nga kapistahan. Adunay pinasahi sa maong selebrasyon tungod kay bag-o ang Santos nga Misa sa alas sais (6) sa buntag nag-iskedyul ug pagpangumpisal ang Kura Paroko nga si Fr. Henry G. Campeon. Dugang pinasahi mao ang gihimong renewal sa marriage vows sa mga gikasal sa Katolikong simbahan. Napulo ka magtiayon ang nag-renew sa ilang pagpanumpa sa kaminyoon. Gibendisyonan usab ni Fr. Henry ang mga biyudo ug biyuda. Dugang pa niini, aduna sab gibunyagan nga bata nga sagad na ginahimo atol sa kapistahan.

Usa pa ka pinasahi sa selebrasyon mao ang pagpili sa Pangulo sa Katilingban nga si Marielou G. Manreal, ang incumbent head sa GKK Finance Committee.

Dakong pasalamat sa katilingban sa Parokya sa Our Lady of Lourdes, pinaagi sa Kura Paroko, Fr. Henry G. Campeon, sa pagpatigayon sa novena mass sulod sa siyam (9) ka adlaw, gikan Mayo 2 hangtod Mayo 10 matag alas sais sa gabii. Ang prosisyon sa mahal nga Patron, Maria, Rayna sa Kalinaw (Mary, Queen of Peace) gipahigayon niadtong Mayo 10, 2024 sa alas 4:30 sa hapon ug kini nagsugod sa kapilya sa Queen of Peace og mituyok sa tibuok katilingban samtang naga-ampo sa Santos nga Rosaryo ug halad-awit kang Maria. Human sa prosisyon gisundan kini sa ika-9 ka adlaw nga Novena ug Santos nga Misa nga gipangunahan ni Fr. Fernando Ingente, SM, guest priest sa OLLP.

Ang siyam ka adlaw nga novena masses gipangunahan sa mga madasigon og maabtikong GKK Servant Leaders, mga Pundok Banay pinaagi sa ilang mga Tigpasayon, Homeowners Association ug ang mga Youth o Batan-on sa katilingban.

Isip mga piniyalan, kami magpadayon sa tawag sa Kristohanong pagpakabana aron sa katilingbanong panaghiusa ug kausa kami sa hagit sa Jubillee Year celebration sa Archdiocese of Davao.

HAPPY FIESTA QUEEN OF PEACE GKK! VIVA HESUS! VIVA MARIA!

(Rowena Baldoza-Villaflor, OLLP SoCCom)