Unang pagdawat sa lawas ni Kristo

Usa ka halandumong adlaw sa kinabuhi sa mga kabataan sa nagkalain-laing tulunghaan gikan sa mga GKK nga sakop sa Sona 6 sa San Roque Parish-Malabog ang nahitabo niadtong Abril 30, 2024. Adunay 15 ka mga kabataan nga gikan sa GKK Sr. San Roque-Kialaw, GKK Sr. San Jose-Beto ug ang host GKK niini ang GKK Sto. Niño Bal-ong ang nakadawat sa lawas ni Kristo sa pinakaunang higayon.

Sa samang higayon niadtong Mayo 3, 2024 aduna usab 36 ka mga kabataan gikan sa GKK Sr. San Isidro Labrador-Pangyan, GKK Sr. San Miguel-Meluya, GKK Birhen sa Kasilak-Tagbao ug ang host GKK niini ang GKK Immaculada Conception-Cabonbon ang nakaambit sa lawas ni Kristo.

Alang sa pagpalawom sa relasyon sa mga ginikanan ngadto sa mga kabataan, gihimo ang recollection inubanan sa facilitator nga usa usab ka PSP Coordinator sa parokya nga si Ms. Jeanet A. Esurez.

Unang higayon sa mga kabataan nga makadawat sa Sakramento sa Pagpangumpisal ug makaambit sa lawas og dugo ni Kristo sulod sa Santos nga Misa nga gipanguluhan sa among Parish Administrator nga si Rev. Fr. Cirilo O. Bermudez.

Mapasalamaton si Padre Lolong nga nagmalampuson ang tanan pinaagi sa pagkugi sa mga katekista sa Sona 6 uban sa ilahang PSP coordinator nga si Ms. Emma S. Bantawig.

Ang Ginoo miingon “kung kinsa ang modawat sa iyang lawas og moinom sa iyang dugo makabaton sa kinabuhing dayon.” Ang rason nganong gusto sa atong Ginoo nga mahilangit ta, tungod kay siya dunay paghigugma kanatong tanan. Busa atoa kining tinguhaon ug paningkamutan. (Noralyn T. Largo | Zone 6 Soccom)