Ang nahigugma mohatag sa kaugalingon

Ika-6 Dominggo sa Pagkabanhaw sa Ginoo (May 5, 2024)
Acts 10:25-26, 34-35, 44-48 / Ps 98:1, 2-3, 3-4 / 1 Jn 4:7-10 / Jn 15:9-17

Siya nga nahiguma mohatag sa kaugalingon ngadto sa uban nga iyang nabati diha sa paghigugma sa Dios sa iyang kinabuhi. Ang sugo sa paghigugma nagagikan gayod sa atong Ginoo mismo. Kini dili malilong nga kamatuoran nga gipadayag gayod niya ug iyang gibilin kanato nga iyang mga tinun-an aron kita mahisama kaniya mahigugma sa Amahan ug ang atong kalipay mahingpit. Ang paghigugma sa atong Ginoo mao ang paghatag sa kaugalingon diha sa kinatibuk-an gayod. Ang pagpakamatay sa kaugalingon alang sa atong higala mao ang labing dako nga gugma nga atong ikahatag ngadto sa kalibutan ug pagtimaan sa atong dakong gugma sa atong isigkatawo ilabina sa atong Dios. Wala lamang kita gitawag sa paghigugma sa atong kaugalingon lamang apan sama sa atong Ginoo andam ihatag ang kinabuhi tungod ug alang sa kinabuhi sa kalibutan. Ang matuod nga nahigugma mao kadtong andam mopas-an sa iyang krus nga iyang hisugatan diha sa iyang panaw paingon sa kahingpitan.

Apan ang kalibutan naghanyag kanato sa sukwahi nga paglantaw sa paghigugma. Ang paghigugma nga ang kaugalingon ang unahon ug ginalantaw ug kalimtan ang uban nga nanginahanglan. Kini nga klase sa paghigugma mao ang atong mahikaplagan ug dili ang adunay pagsakripisyo nga paghigugma. Ang paghigugma sa kaugalingon dili usa ka sayop apan kon ang paghigugma nato sa atong kaugalingon makapahimo na kanato sa dili pagkakita sa panginahanglan sa uban ug ilabina gayod nga himoon nato nga mas labaw ang atong kaugalingon kaysa uban. Kini nga paghigugma wala makasukad sa paghigugma nga gipadayag sa atong Ginoo.

Ang Dios nga nahigugma sa tanan naghatag kanato sa panig-ingnan. Siya nga naghatag sa iyang kaugalingon pinaagi sa pagpasakit ug pagpakamatay didto sa krus aron ang matuod nga paghigugma mapadayag diha kanato. Kini nga paghiguma sa Dios kanato mao ang atong ihemplo sa paghigugma nato sa uban kay kita mga tinun-an man. Kining maong klase sa paghigugma nagkinahanglan sa kombinsidong pagtahan sa kaugalingon ngadto sa Dios nga Amahan.

Sa katapusan, ang atong Ginoong Jesucristo nagpadayag sa matuod nga paghigugma. Siya nga una nga nahigugma kanato kita usab motahan sa atong kaugalingon sa paghigugma ngadto kaniya. Dili kita ang unang nahigugma sa Dios apan siya ang unang nahigugma kanato, kay pinaagi sa maong gugma nga atong nabati sa Dios kita usab andam sa pagpadayag niini ngadto sa uban. Amen. (Rev. Soren Abellanosa)