Mt. Hamiguitan Apil Na sa UNESCO World Heritage Site

Wala’y kabutangan sa kalipay ang grupo nila ni Gov.Corazon Malanyaon sa dihang pormal ng gi-annunsyo ang Mt. Hamiguitan isip kabahin ba world heritage sites sa UNESCO niadtong Hunyo 23, 2014.

Nasayran nga mahinamon nga gihulat sa Philippine delegation sa world heritage committee meeting ang opisyal nga deklarasyon sulod sa pipila ka oras.

Nagpasabot kini nga ang Mt. Hamiguitan sa lungsod sa San Isidro ang gipanag-iyahan na karon sa tibuok kalibutan, ug ang tibuok kalibutan na ang aduna’y dakung katungod sa pagpanalipod ug pag-preserba sa Mt. Hamiguitan Wildlife Range and Sanctuary.

Gilauman na nga kini ang maghatag ug daghang kahigayonan ug kausaban ug kalambuan sa lakat sa lokal nga turismo sa San Isidro ug ning probinsya.

Nasayran nga sa world heritage committee meeting, gituki ang estado sa mga nominado, ug dinhi nasayran ang resulta.

Na-una ini, sa usa ka text message, gipahayag ni Gov. Corazon Malanyaon nga i-ampo gayod ang Mt. Hamiguitan.

Kahinumduman nga sa mga unang tuig pa lang niya sa pagpangatungdanan, gi-asikaso na dayon ni Governor Malanyaon ang mga dokumento alang sa nominasyon sa Mt. Hamiguitan.

Gani, sa gipahigayon nga stakeholders meeting sa mao gihapon nga panahon, ang Mt. Hamiguitan gayod ang napili nga simbolo sa probinsiya, hilabi na sa natad sa turismo.

Natigayon usab kini human  nga mibuwag ang Davao Oriental gikan sa joint nomination ni-ini tali sa Mt. Apo.

Nahimong problema ang nominasyon sa Mt. Apo gumikan sa mga local government units nga nagpahayag ug pagpanag-iya ni-ini.

Samtang gikalipay usab ni Vice-Gov. Mayo Almario ang kalambuan nga na-angkon sa Mt. Hamiguitan.

Samtang alang kang Gov. Malanyaon, “ang kinaiyahan diha sa Mt. Hamiguitan mao ang among gasa sa kalibutan”.

Isip mao’y nag-akda sa bill nga nagtakda sa Mt. Hamiguitan Range and Wildlife Sanctuary nga nahimong Republic Act 9303, gipahayag ni Almario nga nagbunga ra gihapon ang tanang pagpaningkamot alang sa Dahican.

Kalakip na sa delegasyon sa Pilipinas sa meeting sila si Phil. Ambassador Ma. Theresa Lazaro, Tourism Reg’l Director Art Boncato, San Isidro Mayor Tina Yu, Ms. Cynthia Rodriguez, Ms. Marilyn Yumon, ug si Gov. Corazon Malanyaon.

Gipahigayon ang pulong sa Qatar Int’l Convention Center, sa Doha, Qatar.