Misa una, bago lamesa

Miselebrar ang katilingban sa ika-75 nga kapistahan sa GKK San Vicente Ferrer sa Purok 4 Brgy. 76-A Bucana, Davao City.

Diamond Jubilee kung tawagon ang ika-75 nga tuig sa kapistahan sa San Vicente Ferrer, ug parte sa selebrasyon mao ang paghalad sa Santos nga Misa nga gipangulohan ni Reberendo Padre Voltaire Dimol.

Ang GKK kaniadto sumala ni Padre Dimol usa ka isla pa lamang diin napuno ug tubig ang palibot, naa sab higayon nga kini milubog na, apan karon usa na kini ka parte sa dakong yuta kon mainland asa nagpabiling nakabarog.

Sentro sa wali ni Padre Dimol mao ang pagpasalamat sa katukuran sa kapilya ug labaw sa tanan, ang pagpasalamat nga taliwala sa tanang kasinatian, katalagman, ug krimen, nakita ang pagpadayag ug grasya sa Ginoo nga naabot ug 75 ka tuig ang kapistahan sa San Vicente Ferrer.

Miingon sab si Padre Dimol nga kini nga tuig pagpasalamat dili lamang sa kapilya apan apil sab sa mga tagsa-tagsang panimalay sa katilingban.

Tunga-tunga sa homiliya ni Padre Dimol mao ang paghisgot sa ebanghelyo nga kini dili lamang storya sa kagahapon, dili lang kasaysayan sa apostoles, kondili mao kini ang salamin sa kinabuhi isip usa ka Kristohanong katilingban.

Gi awhag ni Padre Dimol ang tanan nga “misa una” aron ang lamesa mapuno ug grasya, dili lang karon nga kapistahan kondili sa tanan adlaw nga muabutay pa.

Natapos ang misa pinaagi sa pagpasalamat ni Padre Dimol sa tanang mitambong ug sa tanang nagtinabangay aron magmalampuson ang kapistahan.

Nagpadayon ang selebrasyon sa katilingban nga puno ug kalipay ug gugma diin nahatagaan sila ug higayon nga mahikap ang istatwa ni San Vicente Ferrer nga napahimutang sa maong Kapilya. (Princess Angeline Pablo – HCDC Intern)