Ang pagpadayag sa Kristohanong pagtoo diha sa dose ka Artikulo sa Kredo sa Pagtoo

ARTIKULO 1

Nagatoo ako sa usa ka Dios, ang Amahan, ang Makagagahum, Magbubuhat sa langit ug yuta, sa tanang makita ug dili makita.

ANG PAGKAPUKAN SA TAWO DIHA SA SALA

PAGKAT-ON SA ATONG KINABUHI

Katkat: Mare, eleksyon na sa Mayo 13, kumusta ka na naa kanay line up sa imong mga kandidato nga botohan?

Nena: Wala pa man mare, daghang man gud ang mga ni kandidato.

Katkat: Mao ba, ang importante mare kabalo kita sa pagsabot sa realidad sa sala sa panahon sa eleksyon.

Nena: Bitaw mare, sama pananglit  sa mahitabo  sa eleksyon, adunay mga motintal kanato nga paliton ang atong boto, sa  dili pagsunod sa atong konsensya ug uban pa makaagni kanato sa pagpakasala.

Katkat: Tama ka mare, mag-ampo gyud kita sa Dios niining panahon sa pagpili og mga lideres sa atong nasud. Ato siyang konsultahon ug pamatian sa atong konsensya kon kinsa gyud ang iyang pillion nga mangulo kanato pinaagi sa atong boto.

Nena: Tinuod kana mare, kinahanglan nga formed ug informed conscience gyud atong bansayon karong mga panahona.

Ang Dios mao ang nagpili og mga pangulo sa usa ka nasud aron maoy modumala sa iyang katawhan. Unsa ang angayan natong matngonan aron malikay kita sa paghimo og sala nga supak sa kabubut-on sa Dios?

PAGKAT-ON SA ATONG PAGTOO

Basahon: Juan 1:29 – Sa pagkasunod adlaw, nakita ni Juan si Jesus nga nagpadulong kaniya ug siya miingon, “Anaa ang nating Karnero sa Dios nga nagawagtang sa sala sa kalibotan!”.

Pamalandong: Ang atong Ginoong Jesucristo mao ang nagwagtang sa mga sala sa kalibutan.Sa pagkapukan sa tawo sa sala gipaniuli sa Dios Amahan ang atong relasyon pinaagi ni Kristo. Giunsa man kini napahitabo? Ato karong tun-an ang gitudlo kanato sa Simbahan mahitungod sa pagbuhat sa Dios kanato. Kini atong mabasa diha sa Compendium of Catechism of the Catholic Church (CCCC # 73-78):

73. Unsaon nato pagsabot sa realidad sa sala? Ang  sala anaa sa kasaysayan. Tataw nga kining reyalidad sa sala masabtan lamang ubos sa lamdag sa diosnong pagpadayag ug labaw sa tanan ubos sa lamdag ni Cristo ang Manluluwas sa tanan. Diin midaghan ang sala, gihimo niya nga magdaghan pa gayod ang grasya.

74. Unsa man ang pagkahulog sa mga anghel?.Kining maong pagpahayag nagatudlo nga si Satanas u gang ubang mga yawa, nga gihigotan sa Balaang Kasulatan ug sa Tradisyon sa Simbahan, mga anghel nga gimugna nga maayo sa Dios. Hinoon, nahimo sila nga daotan tungod kay diha sa gawasnon ug dili mabakwi nga pagpili, gisalikway nila ang Dios u gang iyang Gingharian, ug sa ingon, nahimo ang impiyerno. Naninguha kini sila sa pagdani sa mga tawo sapag-uban sa ilang pagsukol sa Dios. Apan, diha ni Cristo gihimo sa Dios ang segurong kadaogan batok sa daotan.

75. Unsa man ang unang tawhanong sala? Dihang gisulay sila sa yawa, ang unang lalaki ug babaye mitugot nga nga ang ilang pagsalig diha sa ilang Magbubuhat mamatay diha sa ilang kasingkasing. Sa ilang pagsupak buot sila nga “ mahisama sa Dios” apan walay nay labot ang Dios ug dili subay sa Dios (Genesis 3:5). Mao nga, si Adan ug Eva dihadiha nawad-an sa orihinal nga grasya sa kabalaan ug katarong alang sa ilang kaugalingon ug alang sa tanan nilang kaliwat.

76. Unsa man ang sala nga panulundon? Ang sala nga panulundon, ngadto diin ang tanang tawhanong linalang mahimugso, usa ka kahimtang diin gikuha ang orihinal nga kabalaan ug katarungan. Sala kini nga “mingtakboy” kanato nga wala nato “ himoa”; usa kini ka kahimtang sa pagkatawo ug dili personal nga akto. Tungod sa orihinal nga kahiusahan sa tanang katawhan, gipadangat kini ngadto sa mga kaliwat ni Adan “dili sa pag-awat kon dili sa pagsanay”.  Kining pagpadangat nagapabilin nga usa ka misteryo nga dili nato masabtan sa hingpit.

77. Unsa ang mga sangputanan nga gikan sa salang panulundon? Sa sangputanan sa salang panulundon nga tawhanong kinaiya, nga wala nahingpit ang pagkadugta, nasamdan diha sa yano nga gahum. Kini makadala ngadto sa pagka-ignorante, ngadto sa kasakit ug ngadto sa kamatayon ug maagdala ngadto sa sala. Kini nga inklinasyon gitawag og “concupiscence”.

78. Human sa uang sala, unsa may gihimo sa Dios?  Human  sa nahaunang sala ang kalibotan gilunopan sa sala apan wala talikdi sa Dios ang tawo sa gahom sa kamatayon. Hinoon, sa katingalahang paagi iyang gisaad sa “Protoevangelum” (Unang Ebanghelyo) (Genesis 3:15) nga ang daotan mabuntog ug nga ang tawo makabangon gikan sa iyang pagkahulog. Mao kini ang unang pagsangyaw sa Mesiyas ug Manunubos. Mao nga ang pagkahulog pagatawgon sukad karon og “ malipayong sayop” tungod kay  “nakapa-angkon kni kanato og usa  ka labing halangdon nga Manunubos” (Liturhiya sa Bihilya Paskwal)

Integrasyon: (Sa Atong Pagtoo) – Ang kaayo sa Dios walay katapusan ug ang tanan niyang nabuhat maayo. Ang Dios nagbuhat sa tawo diha sa Iyang imahen. (Sa atong Moral) – Kay gihigugma kita sa Dios mao nga iyang gipadala ang iyang bugtong Anak nga Jesucristo aron pagluwas kanato sa sala. Siya nagbilin kanato og sugo nga “Maghigugmaay kamo”. (Sa atong Pagsimba) – Pasalamatan ta ang Dios Amahan nga nagbuhat kanato, saulogon nato ang atong pagtoo uban sa atong Ginoo, ang Yukaristiya.

PAGKAT-ON UNSAON PAGPUYO SA ATONG PAGTOO

Nena:  Mare, salamat sa Dios, kay wala ko napukan sa pagpakasala panahon sa eleksyon?

Katkat: Unsay buot nimong ipasabot ana mare?

Nena: Napamalandungan nako karon nga importante nga magpakamatarung ug magmatinud-anon kita sa kabubut-on sa Dios aron malinawon usab ang akong pagbati.

Katkat: Bitaw mare, angayan gyud nga likayan nato nga napukan kita sa sala sa pagpasagad, pagka-garboso ug paghimo gayud sa angayan nga buhaton.

Pamalandong ug Buhatonon:

1. Alang kanimo, unsa ang imong himoon nga masuod ka sa atong Ginoong Jesucristo?
2. Unsaon nimo pagtabang ang imong kaugalingon u gang uban nga dili mapukan diha sa pagpakasala?

Pag-ampo: (Salmo 100: 4-5) – Sulod kamo sa iyang Templo ug paslamati siya didto; sulod kamo sa Iyang balaang puloy-anan ug dayga siya didto! Pasalamati ug dayga siya!. Ang Ginoo maayo; molungtad ang iyang gugma ingon man ang iyang pagkamatinud-anon hantgtod sa tanang kaliwatan.

—————————

JCC  file 27, vds, May 13 issue

—————————