Sr. San Vicente Shrine

Nahibalo ba kamo nga dunay shrine o balaang dapit nga ang patron si San Vicente Ferrer dinhi sa Arkidyosis sa Davao? Ang milagrosong imahe ni San Vicente makita didto sa Brgy. Mulig sa Toril. Sudlonon kini apan dali rang makita ang timailhan tungod sa arko nga gibutang daplin sa dalan. Sakop ang shrine sa parokya sa Virgen de los Remedios, Crossing Bayabas nga karon ang kura paroko si Reberendo Padre Anthony “Don” Silvosa.

Karong umaabot nga Abril 10, mao ang ilang pagsaulog sa ilang ika-106 nga kapistahan isip usa ka katilingban ug ika-6 nga kapistahan isip Archdiocesan Shrine. Ang maong dikreto sa iyang pagka-shrine migawas niadtong 2018 pinaagi sa pagpanguna sa kanhing kura paroko nga si Reberendo Padre Johnny Autida.

Sa pagkakaron, ang maong shrine gidumala sa mga lideres ug volunteers gikan sa pito ka mga GKK nga nagpalibot niini. Usa na si Ate Jocelyn Eleccion nga katekista sa shrine. Siya ang usa sa mga nangalagad sa maong balay-alampoanan. Dinasig sa Balaang Espirito Santo ubay-ubay gyud ang mga katawhan nga mudayo aron sa paghalad sa ilang mga pag-ampo.

Usa dinhi sila si Mr. and Mrs. Gilberto ug Mercedes Dangoy nga mga parokyano sa Ascension of the Lord sa GSIS, Matina, Davao City. Dugay na silang mga deboto ni San Vicente. Usa sa ilang mga pag-ampo bahin sa maayong kinabuhi sa ilang mga anak.

Sumala pa ni Ms. Roselyn Mclnerney, “Si San Vicente Ferrer diha sa Mulig, wala siya nagpaila nga santos lang sa GKK sa Mulig, kondili siya ang espesyal nga santos tungod kay iyang gipabati sa uban pinaagi sa damgo.” Sa iyang pagsaysay, dunay usa ka hitabo gikan sa Panabo nga ang iyang anak nasakit, ang mama gipadamgo ni San Vicente sa iyang pulong nga “adtoa ko sa Mulig” Matud pa sa magtiayon stranghero kaayo sa ilaha ang Mulig nga lugar. Apan sa ilang pagsalig ug paglaum kang San Vicente ilang natultulan ang lugar nga Mulig. “Angayan gayod siya nga gihimo nga Shrine ug naay kapasidad nga makabarog pinaagi sa walay puas nga suporta sa iyang mga tinambalan,” dugang ni Ms. Mclnerney.

Kinsa ba diay kini si San Vicente Ferrer? Si San Vicente Ferrer usa ka Dominikanong pari nga gikan sa Espanya. Siya usa ka bantugang magsasangyaw nga nahibalo sa nagkalain-laing mga pinulongan. Apan kining iyang pagka- magtutudlo iyang gibiyaan aron sa pagmisyon. Siya kahinumdoman nga maoy tulay sa pagkakabig sa daghang mga Judeo. Siya giila gayud nga dunay gasa sa pagmilagro.

Rason nga daghan gayod ang mulangyaw ug bisita aron sa pagpangayo sa iyang pangaliya ngadto sa Dios. Kahinumdoman sa mga karaan nang mga nangalagad sa shrine, nga ang estatwa ni San Vicente sa kaniadto gamay pa, apan nagtubo kini nga daw susama sa usa ka bata nga nahimong ulitawo ug nahimong hamtong.

Unsa kaha ang mga hagit nga batonan sa mga deboto ni San Vicente aron mapuy-an ang ilang debosyon? Tubag ni Ms. Mclnerney, “sama sa pag-ila kang San Vicente pinaagi sa pagnovena, nga ang pipila ilang himoon nga gitawag ug usa ka luhod basahon ang siyam ka adlaw. Ang uban pagahimoon ang novena sa siyam ka byernes. Ug ang pinaka challenge sa iyang mga deboto ang pagbuhat ug pagsunod sumala sa kinabuhi ni San Vicente, ilabina na ang pagwali sa maayong balita, ug mapaambit sa uban ilabina katong wala pa nakaila ug Ginoo ug ang pagtuman sumala sa ilang mga tagsa-tagsa ka panaad.”

Ang shrine sa Mulig usa lamang sa daghang mga katilingban nga ginasahan sa milagro pinaagi sa iyang pangaliya. Mao kini ang oras sa mga misa sa umaabot nga selebrasyon sa iyang kapistahan sa Mulig.

Abril 10, 2024
7:00 a.m.
9:00 a.m. (Pontifical Mass)
3:00 p.m.
4:30 p.m.

(Photo: San Vicente Ferrer Shrine – Mulig FB Page)