San Jose, Unang Piniyalan sa Natuman nga Saad sa Dios

Hayag kaayo ang kaugmaon sa GKK San Jose, Elenita Heights, sakop sa Parokya sa Immaculada Conception, Mintal. Sa ika-25 nga kapistahan sa maong GKK, si Arsobispo Romulo G. Valles, D.D., arsobispo sa Davao, nga maoy nangulo sa Misa niadtong milabay nga Marso 19, miingon, “ugma damlag, dili ko mosaad kaninyo, maybe in the near future mahimong parokya ang atong katilingban.”

Gidayeg ni Arsobispo Valles ang mabulokon nga partisipasyon sa ilang kasaulogan sa Misa, ilabina ang ilang rondalla nga miduyog sa Misa kay matod niya, “pagka first class, Davao gyud kaayo, Pinoy gyud kaayo”. Siya nagkanayon nga, “ang inyong music, ang inyong gozos hinaut unta nga mahimong inspirasyon.”

Ang maong kapistahan nagdala sa tema, “San Jose sumbanan sa mapaubsanon ug kasaligang piniyalan sa pamilya ug sa simbahan.” Gipangutana niya ang mga nanimba kon unsa man ang gipiyal sa Ginoo kanato. Siya miingon nga, “ang gipiyal kanato hangtod karon, for 25 years mao ang gasa sa pagtoo. Kung wala, nipis, niwang, makalimtan ang gasa sa pagtoo, kitang mga tawo dali mailad.”

Gipasabot niya nga “walay matuod nga kalipay kung walay pagsalig sa Dios, nga maoy unang gipiyal sa Dios kang Maria ug Jose.” Dili kuno mahimo nga kita moingon, “tmbok ko, mabuhi ko pinaagi sa akogn pitaka,pinaagi sa akong kusog, pinaagi sa akong bahandi. We cannot be happy unless we are always connected with the Lord.”

Dugang ni Arsobispo Valles nga kining maong pagtoo maghatod kanato sa kinabuhi nga isalig sa Ginoo. “Day in and day out we continue to be close to the Church, with the katilingban. Kay kung malayo kita sa Ginoo with that basic relationship sa Ginoo, moabot ang adlaw atong kaugmaon nga ang atong kinabuhi kulangon sa kalipay.”