DADITAMA Recollects, Serves

“Hear, O Israel!” Hagit ni Jesus sa iyang pagpaminaw sa tawong nangutana kaniya sa labing importanteng sugo.

Ang pagpaminaway ug panag-inigsuonay gipadayon sa Archdiocese sa Davao kauban ang mga diocese sa Digos, Tagum ug Mati (DADITAMA) diha sa ilang ka-tulong adlaw sa Pagpamalandong ug Panagtagbo sa unang quarter ning tuiga. Kaniadtong Marso 8, nagtigum ang mga Obispo, pari ug layko sa lain-laing apostolado niining mga lokal nga Simbahan isip pakusgan aron pagpadayon sa misyon sa Magbubuhat.

Didto sa Mergrande Ocean Resort, Talomo, Davao City, ang DADITAMA nagtagbo aron sa pagpaminaway sa matag kasinatian. Ilang gihisgutan ang mga plano, alatimanon, ug kauswagan niining mga diocese ug kung unsaon nga makatabang sa paglig-on sa simbahan luyo sa pagsulay sa panahon.

“The Holy Father operates in a manner where everybody is being consulted and heard in the experience of synodality,” sumala pa sa Obispo sa Mati, Most Rev. Abel C. Apigo, D.D., sa iyang homiliya.

Pinaagi sa tradisyonal nga panagtigum sa DADITAMA, kaupat matag tuig, gipaningkamutan ang paglawig kauban ang mga Gagmay’ng Kristohanong Katilingban, mga kabatan-onan, kaparian ug lain-laing mga pundok sa pagtoo nga walay maulahi sa atong Simbahan. Garbo kini sa DADITAMA sa tibuok Minadanao isip regular nga panagtapok aron pagpadayag sa kauban nga paglawig alang sa pastoral nga pag-atiman sa katawhang magtotoo. (Prenciss Jane S. Pandeling | HCDC Intern)