“Walk with Mercy for the Poor” – Opening Salvo alang sa ika-75 Anibersaryo sa Simbahan sa Dabaw

Usa ka dakong kalihukan ang giandam alang sa unang binulan nga nobena isip selebrasyon sa ika-75 nga anibersaryo sa Simbahan sa Arkidayosis sa Dabaw ubos sa kinatibuk-ang tema: “Journeying Together as a Synodal Church Living Out the Spirituality of Stewardship in our Basic Ecclesial Communities / Gagmay’ng Kristohanong Katilingban (GKKs)”.

Human nga gilusad ang Diamond Jubilee Celebration niadtong Pebrero 22, 2024 atol sa pagtak-op sa National Bible Workshop sa San Pedro Cathedral, giablihan gilayon ang una sa siyam ka bulan nga selebrasyon pinaagi sa usa ka adlaw nga panagtigom sa tanang Parish Social Action Ministry sa tibuok 42 ka mga Parokya sa arkidayosis nga gipanguluhan sa Archdiocesan Social Action Center (ASAC).

Sulod sa University of the Immaculate Conception (Bajada Campus) gipalawman ug gipasabot pag-ayo sa dinapit nga mamumulong nga propesor sa Ateneo de Davao University ug sa Ignatian Institute of Religious Education Foundation (IIREF) nga si Lunar Fayloga, ang sub-theme sa 1st Novena Month : “Pastoral Care of People with Need of Special Attention,” isip start up/kick-off nga kalihukan.

Dinhi gipresentar ni Reb. Padre Leonardo “Bong” Dublan, Jr., Director sa ASAC ang panapos nga dakong kalihukan ubos sa unang bulan sa selebrasyon, ang “WALK WITH MERCY FOR THE POOR” nga gitakdang pagahimoon sa Kapistahan sa Diyosnong Kalouy kon Divine Mercy Sunday sa Abril 7, 2024.

Gipasabot ni Padre Bong Dublan nga gitinguha nga makasalmot ang sobra tres mil ka mga katawhan sa maong kalihukan,. Tumong usab niini mao nga mamahimo kining dalan nga makapaamgo sa katawhan ug makaani ug suporta alang sa mga kabus kinsa huyang ug dali nga maapektuhan ilabi na panahon sa mga katalagman, “Busa, hagit alang sa tanan ilabi na ang mga apostolado, mga ministriya ilabi na kadtong alang sa mga kabus nga magsalamin sa kaluoy sa Diyos.”

Tungod kay matud ni Papa Francisco, ang ngalan sa Diyos mao ang kalouy, “Dili ako daling masuko. Puno ako sa gugmang walay paglubad ug matinumanon. Nahigugma gayod ako ug nagatuman sa akong saad ngadto sa linibo ka kaliwatan ug nagpasaylo sa mga sala ug kalapasan.” (Exodo 34: 6)

Adunay upat ka mga starting points diin magtapok sa alas-4 ang takna sa buntag ang mga mosalmot sa Walk with Mercy for the Poor, sama sa Our Mother of Perpetual Help, Assumption Parish, Sta. Ana Shrine Parish ug San Pablo Parish ug matapos sa San Pedro Cathedral alang sa Santos nga Misa sa alas 6:30 sa buntag. Human sa Santos nga Misa, pagahimoon ang hamubo nga programa alang sa mga nanambong.

Mamahimong magpalista sa tagsa-tagsa ka mga Social Action Coordinator o animator sa Parokya alang sa buot nga motampo sa ilang donasyon nga P 400 ug mosalmot sa Walk with Mercy for the Poor. Ang mga makarehistro mamahimong mopalit usab sa drifit nga tshirt sa kantidad nga P 200.

Atol sa press conference sa PNP Press Corps adlawng Miyerkules sa Royal Mandaya Hotel, gibutyag sa event organizer nga si Dennis Mabayao nga abli ang maong kalihukan sa publiko ingon man sa mga sibiko, gobyerno, mga tulunghaan ug mga kompaniya kinsa buot nga makatabang sa paghipos ug pundo alang sa katalagman sulod sa Arkidayosis sa Dabaw.

Siya midugang nga gi-andam na ang paglig-on sa koordinasyon tali sa local nga gobyerno particular na ang Davao City Disaster and Risk Reduction Center alang sa disaster response aron nga maklaro ang papel sa simbahan sa pagresponde atol sa katalagman.