Bisita Pastoral 2024 (Part 1 of 2)

Nagmalampuson ang tulo ka adlaw nga Bisita Pastoral sa atong halangdon nga Arsobispo sa Davao, Most Rev. Romulo G. Valles, D.D sa San Alfonso Ma. de Liguori Parish sa Mandug kaniadtong Pebrero 29 hantod Marso 2. Sa unang adlaw pa lamang sa bisita pastoral gisugat na siya sa mainiton nga gugma ug kadasig sa mga parokyano sa Mandug, ang unang hugna sa welcome party nanukad gikan sa DECA HOMES ESPERANZA Tigatto kung asa nahimutang ang GKK Our Lady of Peňafrancia. Gisugat sa mga parokyano ang gisakyan sa atong Arsobispo ug wala sila pakyasa kay ninaog mismo siya sa iyang sakyanan ug nakig himamat sa mga naghulat nga mga parokyano, mao gibuhat sa tanang mga dalan nga adunay naghulat nga welcome party hangtod na padulong sa parokya. Dako na lamang ang katingala sa mga naghulat sa parokya nga ang sakyanan ni Archbishop Valles walay unod, kay diay ninaog siya ug gihimamat ang mga naa sa gawas sa parokya naghulat.

Nagsugod ang Santos nga Misa alang sa iyang unang adlaw sa pagbisita sa alas 6 sa kagabhion kung asa gitambungan sa mga GKK servant leaders ingon man mga parokyano sa San Alfonso. Sa iyang homiliya iyang gisaysay ang iyang dakong kalipay human niya nasaksihan ang mga hulagway sa mga parokyano nga naghulat kaniya bisan paman sa dili maanindot nga panahon. Sumala niya nga wala siya magdahom nga naay pa welcome kay ang iyaha lang muadto sa parokya ug naay gamay nga ritwal pagabuhaton nga mao ang pagluhod ug pagampo, paghalok sa crusipiho ug pagbendita sa mga katawhan. Nalipay usab siya nga makakita sa hulagway sa mga batan-on ingon man mga katigulangan.

Ang unang adlaw sa bisita pastoral gitagana alang sa pakighimamat sa mga mandated organizations, Parish Pastoral Council ug ingon man sa mga GKK Servant leaders. Sulod sa Interaction with the Archbishop ang nagkadaiyang pangutana mahitungod sa pagserbisyo, issue sa simbahan ug ingon man pagpadayag sa ilang mga kalampusan ngadto sa atong halangdong Arsobispo. Usa sa mga pangutana kaniya mao ang iyang panan-aw ngadto sa deklarasyon sa Fiducia Supplicans, nga init kaayo nga issue sa mga magtotoo. Ang Fiducia Supplicans mao ang deklarasyon nga gipanaog sa Vatican mahitungod sa pagbendisyon sa mga Same Sex Couple. Iyang giplakaro nga dili kini pagbendisyon sa ilang kaminyoon o union kondili ang pagbendisyon sa indibidwal nga kaluy-an sila sa Ginoo. Iyaha usab nga gipkalaro nga dili dayon mutoo ug maminaw sa mga naga post sa social media mahitungod sa maong issue, sutaon usa ang kamatuoran ug baruganan sa simbahan mahitungod sa maong deklarasyon. Aduna usab nagpadayag ug imbatasyon ngadto sa Arsobispo sa ilang umaabot nga kapyestahan nga kung pwede ba daw siya ang mumisa kanila. Sumala ni Archbishop pwede kaayo pero tan-awon sa niya ang iyang mga schedule. Adunay mga pangutana mahitungod sa yuta sa kapilya ug mga awit sa misa. Gitapos sa Arsobispo ang unang adlaw sa pagpangapud-apod ug rosaryohan ngadto sa mga lideres. (To be continued)

(Jomar Earl Narciso | San Alfonso de Ligouri Parish)