Save Life, Donate Blood

“Save Life, Donate Blood” mao kini ang tema sa unang Mobile Blood Donation Program (MBD) kon Blood Letting niining tuig sa 2024 sa St. Mary of the Perpetual Rosary Parish niadtong February 25, 2024 uban sa pakigtambayayong sa Davao Blood Center sa Department of Health (DOH) nga gipahigayon sa alas 6:00 sa buntag hangtud alas 11:00 sa udto sa St. Mary Parish Gym.

Ang MBD maoy usa sa mga regular nga programa sa Parish Social Action Ministry (PSAM) nga gipangulohan ni Joel Corage, PSAM coordinator, giniyahan sa Kura Paroko, Fr. Dionisio Tabiliran ug inabagan sa MBD in-charge, Eloisa Doña, mga GKK Servant Leaders (GSLs) ug mga volunteers.

Adunay 170 ka mga parokyano ang mitahan sa ilang kaugalingon aron modonar sa ilang dugo apan adunay 142 lamang ang nagmalampuson nga nakuhaan og dugo tungod sa mga nagkalain-laing hinungdan sama sa hamubo ang hemoglobin, kulang sa tulog, bag-o lang nabakunahan, taas ang blood pressure ug uban pa. Nagmadasigon ang mga blood donors uban sa tinguha nga ang ilang dugo nga gidonar makaluwas sa kinabuhi sa uban ilabina sa ilang pamilya. (Hermie Mapute | SMPRP SoCCom)