Maamhot nga Birhen sa Lourdes

“Imo kaming panabangan maloloy-on nga Inahan gidayeg ka sa mga angheles, maamhot nga Birhen sa Lourdes.”

Kini ang liriko sa gozos nga maoy gihandum ug gi-ampo sa mga deboto sa Birhen sa Lourdes. Usa kini ka titulo sa Bulahan nga Birhen nga nagpakita niadtong Pebrero 11, 1858, sa 14-anyos nga si Bernadette Soubirous sa usa ka groto sa Lourdes, France. Sugod Hulyo 16, lima ka bulan ang milabay, si Maria nagpakita sa 18 ka higayon ug gipahayag nga siya ang Immaculate Conception. Ang pilgrim sa Lourdes milagrong nangaayo pinaagi sa tubig sa maong tubod.

Niadtong Pebrero 11, 2024 mao ang ikatulo nga kapistahan niining Patron sa Zona 9, Barangay Tigatto, Davao City, sakop sa St. Mary of the Perpetual Rosary Parish – Buhangin. Ang Tema: “BIRHEN MARIA, HALANGDONG INAHAN, SUMBANAN SA GUGMA, MANGGIHATAGON UG MAPAAMBITON ISIP PINIYALAN.” Gisaulog usab sa simbahan ang ika-32 ka tuig sa World Day of the Sick kon Pangkalibutanong Adlaw sa mga Masakiton.

Isip pagpangandam sa maong kapistahan, gisugdan kaniadtong Pebrero 01, 2024 ang unang gabii sulod sa siyam ka adlaw sa Novena – Kasaulogan pahinungod sa Patron Birhen sa Lourdes. Gihimo usab ang prosisyon sa patron adlaw’ng Biyernes, petsa 9 sa Pebrero sa alas 2:00 sa hapon gikan sa host chapel, ang Gagmay’ng Kristohanong Katilingban (GKK) San Isidro Labrador, Tigatto 8 padulong ngadto sa mga kaubang GKK.

Ang kapistahan gipangunahan ni Mrs. Carmen Galang, Pangulo Sa Katilingban (PSK) Coordinator sa Zone 9 inubanan sa 5 ka PSK, mga GKK Servant Leaders (GSLs) ug miyembro sa ubang sakop niini nga mao ang mosunod: GKK Birhen Medalla Milagrosa-Tigatto 9, GKK San Vicente Ferrer-Sta. Marina, GKK Sto. Niño-Urban (Lote-Lote), GKK Sto.Niño-Lapanday, GKK Sto. Niño-Hillside ug ang host chapel, ang GKK San Isidro Labrador-Tigatto 8.

Ang Santos nga Misa sa alas 10:00 sa buntag, Pebrero 10 gipangulohan ni Rev. Fr. Dionisio Tabiliran, Kura Paroko. Misunod ang panagtapok sa unom ka GKK sa Zona 9 sa Gym aron sa pag-inambitay sa mga grasya nga giandam. Gipahigayon usab dayon ang Zonal Meeting aron sa paghisgot sa mga umaabot nga kalihukan. dunay makalingaw nga mga parlor games.

Matud pa ni Fr. Diony, ang pagkinabuhi diha sa pagpasalamat mao ang kinaiya sa usa ka Kristohanon diin kita piniyalan sa grasya sa Ginoo ug mamahimo kitang mapaambiton nga nagpadayag sa atong pagkamapasalamaton. Si Kristo naghatag kanato ug grasya nga magmalig-on kita kanunay. Si Maria maoy gihatag kanato nga atong inahan aron mamahimo natong panag-ingnan. Ato unta siyang dawaton ug angkonon nga atong Inahan sumala nga si Kristo anak ni Maria.

Dalaygon ang DIOS. Viva Maria! Viva Hesus!

(Arsenio H. Berdera, Jr., GKK SoCCom SMPRP | Photos by JB)