Makaalim nga Pulong sa Dios

Ika-5 nga Domingo sa Ordinaryo nga Panahon (February 4, 2024)
Job 7:1-4, 6-7 / Ps 147:1-2, 3-4, 5-6 / 1 Cor 9:16-19, 22-23 / Mk 1:29-39

Ang tanan nangita kang Jesus human sila makasaksi sa iyang gihimo, pag-ayo sa mga masakiton, pagpahawa sa mga yawa. Kini nga kamatuoran nagpakita nga ang atong Ginoong Jesucristo adunay gahom sa paghimo sa ingon. Ang maong kamatuoran nakasukad diha gayod sa Dios. Ang Dios nga nagpakatawo aron ikapadayag niya ang iyang dakong gugma kanatong tanan pinaagi sa paghaw-as kanato sa kaulipnan sa sala ug kamatayon. Kini mao ang gihimo sa atong Ginoong Jesucristo ang pagpadayag sa iyang makaluwasnong gahum.

Sa laing bahin, ang mga tawo nangita sa atong Ginoo dili tungod kay sila nakasabot sa gihimo sa atong Ginoo nga mao ang pagluwas sa tawo diha sa pagka-ulipon ngadto kang Satanas apan nangita sila tungod kay nang-ayo ang atong Ginoo sa mga masakiton ug nagpapahawa sa mga yawa. Ang ilang pagsabot sa gihimo sa atong Ginoo mao lamang ang tawhanong kaayohan ug dili ang Diosnong pagpadayag sa dakong gugma sa Dios ngadto sa iyang katawhan nga mao ang pagbadbad sa gapos sa sala ug dautan.

Ang atong Ginoo nasayod niining tanan og mao nga siya nag-ingon sa iyang mga tinun-an nga moadto usab sila sa laing lungsod aron ikasangyaw niya ang maayong balita. Ang pagsangyaw sa pulong inubanan sa buhat maoy labing konkrito nga lakang aron mas katoohan ug balido ang pagsayaw. Ang gihimo sa atong Ginoo nga mao ang pagsangyaw sa maayong balita ug pag-ayo sa mga masakiton ug pagpahawa sa mga yawa maoy labing hingpit nga buhat sa kaayo sa Dios diha sa atong taliwala. Ang Dios lamang ang adunay katakos sa pagtangtang sa gapos diha sa atong tagsa-tagsa ka mga kaugalingon. Siya lamang ang adunay gahom aron sa pagpabalik kanato sa tinood natong pagkatawo.

Sa matag higayon nga ang Dios magpadayag sa iyang pulong, ato kining patuhopon diha sa atong mga kasingkasing ug hunahuna aron ang iyang pulong maggiya kanato sa atong kinabuhi ug aron ang atong kinabuhi puno sa pulong sa Dios ug pinaagi niini kita makahimo sa mga bulohaton nga Diosnon. Ang pag-ambit nato sa misyon sa atong Ginoong Jesucristo nga mao ang pagsangyaw sa maayong balita ug inubanan usab sa atong mga buhat aron kita mismo sa atong kaugalingon kombinsido sa atong gisangyaw. (Rev. Soren Abellanosa)