JCC mipasiugda’g updating sa mga head catechists

Gitapok sa John XXIII Catechetical Center (JCC) sa Archdiocese of Davao ang 33 ka head catechists sa nagkalain-laing mga parokya sa Dabaw alang sa in-service training sa pamaagi sa pagpanudlo sa katekismo nga himoon sa mga kapilya ug mga eskwelahan sa syudad.

Sumala ni Sr. Lydia Perales, TDM, staff sa JCC, binulan kini nga kalihokan sa JCC ug gituyo nga tanang head catechists sa Dabaw ang giimbita tungod kay magsugod na sunod bulan ang pagpanudlo sa mga bata sa eskwelahan ug kinahanglan andam na ang mga katekista sa ilang materyales ug training.

Dugang niya nga ang in-service training nga gihimo June 18, didto sa San Pedro Cathedral, gihimo aron hisgotan ang mahitungod sa pamaagi sa pagpasabot kon lesson plan sa Catechism of the Catholic Church (CCC) ug ang module sa Year of the Laity nga kasamtangang gisaulog karon.

Higayon na usab ang maong training aron maghisgot-hisgot ang mga head catechists sa ilang mga kasinatian sa pagpanudlo sa katekismo ug ilang mga problema nga giatubang sa ilang tagsa-tagsa ka mga eskwelahan ug kapilya nga ginatudloan sa mga volunteer catechists sa mga parokya.

Giingon usab niya nga kadaghanan sa mga public schools sa basic education level (elementary ug high school) nagahatag og usa ka oras matag semana aron magtudlo ang katekista sa mga bata. Pipila usab sa mga skwelahan ang nagahatag ug duha ka oras matag semana. Kini subay sa permit nga gihatag sa Department of Education (DepEd) ngadto sa JCC nga maoy nagadumala sa pagpanudlo sa katekismo sa Arkidyosesis sa Dabaw.

Dugang ni Sr. Perales nga sa mga umaabot nga bulan, himoon na ang in-service training sa vicariate level. (@johnfrancesf)