Puno sa paglaum

Dear Ate Emz,

Strong will, desire to live longer, determination and perseverance: kini ang mga qualities nga akong nakita sa akong higala. Puno sa talento kay hanas musuwat ug mukanta. Ilado kini siya sa local music industry ug nailhan sa mga trending nga sonata. Himsug kaayo kini siya kaniadto ug sa dihang milabay ang mga panahon natingala na lang ako ug grabe ang kausaban sa iyang panglawas. Akong na diskubrehan nga duna diay siya’y balatian nga dili ko na lang isay-say aron sa iyang privacy ug confidentiality.

Akong nakita sa iyang personalidad nga dili siya basta-basta nga mawad-an og paglaum. Sa iyang kahimtang murag sa akong tan-aw dili na kini magdugay apan sobra ang iyang fighting spirit. Dili siya ang klaseng tawo nga mu-surrender dayun. Padayun ang iyang pagpakigbatok sa iyang kahimtang. Nahibulong na lang gani ako nga milungtad siya ug dugay nga magpahantud karon surviving pa gihapon.

Kabaliktaran sa akong panglantaw sa kinabuhi. Kay kung siguro ako ang anaa sa iyang kahimtang lagmit nalusno na ako hagbay ra. Ang iyang ugali sa pagpakigbatok sa iyang kahimtang, balatiang panglawas, nakumpara nako ang akong kaugalingon nga dapat ingon ini ang akong panglantaw sa kinabuhi. Laban hangtud sa katapusan. Hinaut pa unta.

Salamat,
Vince

* * * * * *

Dear Vince,

Salamat sa Diyos sa gasa sa kinabuhi…ang gasa nga usahay atong gibalewala sa pagbangon nato matag adlaw aron atubangon ang mga panalangin nga naghulat kanato.

Ang ubang mga tawo, usahay wala lang nila nahibal-an, nga sa daghang mga higayon nagtudlo kanato og mga leksyon sa kinabuhi pinaagi sa ilang mga ehemplo. Atong gisundog ang mga maayong buhat nga ilang nahimo.

Sama sa imong nasinati, daghan kaayo kang nakat-onan sa imong higala nga nakaagi og daghang pagsulay sa iyang kinabuhi. Sa iyang hilum nga mga paagi, imong nasaksihan kung giunsa niya pagsagubang ang iyang kaugalingon nga mga hagit, ug sumala pa nimo, adunay “strong will, desire to live longer, determination and perseverance”. For sure kining imong amigo gihanda na kini siya sa atong Ginoo, ug dinha taliwala sa mga pagsulay, na develop ang ingon nga mga kinaiya ug panglantaw sa iyang kinabuhi. Giumol na ang iyang kaisog ug pagsalig sa atong Ginoo pinaagi sa iyang mga naagihang mga kasinatian nga mga kasakit ug mga pagsakripisyo.

Samtang naghunahuna sa kahimtang sa imong higala, nakahinumdum ko sa usa ka higayon kaniadto bahin sa usa ka pari nga naay gisulti sa pasyente nga dugay na nga bedridden. Nag sulti siya nga ang tanang giagian sa pasyente makonsiderar nga usa ka “redemptive suffering”. Dugang pa niini, siya miingon nga bulahan daw kadtong nag-antos sa mga sakit tungod kay pinaagi sa paghiusa niini nga krus uban sa kang Hesus ug paghalad sa ilang mga kasakit, kahasol, mga sakripisyo, etc., sila dunay kahigayonan sa pagtabang nga makabaton sa kapasayloan sa mga sala, kaluwasan sa mga kalag, pag-ampo alang sa mga katuyoan sa Santo Papa, alang sa Simbahan, alang sa mga misyonaryo, ug alang sa tanan nga uban pang mga katuyoan nga mahunahuna sa usa ka indibidwal. Niining paagiha, ang ilang giagian dili maosik kondili mahimong mas makahuloganon og makatubos. Busa, makasulti kita nga ang mga pag-antus, makasantos, kung gihalad kini sa atong Ginoo.

Imong gihisgutan nga kung ikaw ang naa sa iyang sitwasyon, “lagmit nalusmo na ko hagbay ra”. Apan walay rason nga itandi ang imong kaugalingon sa imong higala o sa uban. Aduna kay kaugalingong mga pagsulay ug mga hagit ilabi nang alang kanimo lamang ug sumala sa plano sa atong Ginoo. Bisan unsa ka bug-at ang imong krus, kini kanunay nga inubanan sa gikinahanglan nga mga grasya aron ikaw mahimo sa pagpas-an niini samtang ikaw nakihiusa sa imong kaugalingon ni Jesus. Nasayod ang atong Ginoo sa imong kapasidad, busa, pagpasalamat nga wala ka hatagi ug palas-anon nga sama kabug-at sa imong higala.

Usa kini ka gasa nga nalamdagan ka, ug tungod niini, nakaamgo ka og bag-ong panglantaw sa kinabuhi. Sa ingon, maatubang na nimo sa laing pamaagi ang bisag unsa nga mga hagit nga moabot dinha kanimo. Ug tinuod, laban lang, hangtud sa katapusan. Sama sa giingon ni St. Padre Pio, “pag-ampo, paglaum, ug ayaw kabalaka”. Makasalig ka, and tanan grasya sa Ginoo ug dili gyud ka Niya biyaan, ug magpabilin Siya dinha kanimo basta konektado ka lang kanunay Kaniya.

Basta dawaton lang nimo ang imong krus, uban ang mapailubon nga paglahutay, pagsalig ug tungod sa imong gugma sa atong Ginoo, mabuntog ra nimo ang mga pagsulay. Ug sa wala lang nimo mahibaloi, sa imong kaugalingong gamay nga paagi, mahimo ka usab nga instrumento sa pagdasig o paglig-on sa uban nga imong mahimamat diha sa dalan sa imong paglawig aning kalibutan. And may your tribe increase.

God bless you more and may your tribe increase.
Ate Emz