Pagtudlo nga may awtoridad

Ika-4 nga Domingo sa Ordinaryo nga Panahon (January 28, 2024)
Dt. 18:15-20 / Ps. 95:1-2, 6-7, 7-9 / 1 Cor. 7:32-35 / Mk. 1:21-28

Unsa kaha atong makuha kon ikaw tudloan sa usa ka tawo nga walay awtoridad? Lagmit wala ka’y makuha gikan niini. Moadto ka pa ba ug maminaw kaniya? Siyempre dili na! Mas gusto nimo nga moadto ug maminaw sa tawo nga nagtudlo nga adunay awtoridad ug kombiksyon, tungod kay aduna kay makuha diha kaniya.

Ug gani diha sa atong Ebanghelyo, Si Jesus nagtudlo ug duha ka butang: ang awtoridad ug kombiksyon, nga mao ang hinungdan ngano ang mga tawo didto sa sulod sa sinagoga nahingangha ug nagdayeg kaniya. Napalig-on kini diha kanila sa dihang ilang nakita mismo sa ilang mga mata nga gibadlong ni Jesus ug gimandoan ang daotang espiritu sa paggawas sa tawo nga gisudlan niini.

Si Jesus nakigsulti gihapon kanato hangtod karon, uban ang iyang awtoridad ug kombiksyon labi na kung kita mismo seryoso sa atong mga pagbasa ug pagtuon sa bibliya nga dali makasabot kanato nga si Hesus direktang nakigsulti kanato. Apan ang dakong pangutana karon; nagabasa pa ba ta sa bibliya? O basi naabugan na.

Ang tawo nga gisudlan sa mahugawng espiritu nakamatikod dayon sa presensiya ni Jesus mao nga sa dihang si Jesus miingon: “Hilum! Gumola kaniya!” Diha-diha dayon kini nagkurog ug nalingkawas dayon sa dautang kabtangan.

Mao usab kini ang buhaton ni Jesus sa atong kinabuhi kung tugutan nato Siya nga makigsulti kanato pinaagi sa pagbasa sa bibliya. Ug kon tugotan nato Siya nga makigsulti kanato pinaagi sa atong Diosnong presensya sa Santos nga Misa. Iyang papahawaon ang tanang demonyo ug sakit niining materyal nga kalibutan nga hinayhinay nga nag-ulipon sa kadaghanan kanato. (Rev. Ranie Boy Pamplona)