Tawag Sa Pagpangalagad

Dear Ate Emz,

Ang akong kasinatian mahitungod kini sa akong mga obserbasyon sa among pagpamuyo. 20 years na kami nga minyo ug 3 na ang among mga anak ug dagko na sila. Sa pagkatinood lang usa ako ka aktibo nga naga alagad sa simbahan. Apan naglisud ako sa pag-aghat sa akong kabanay sa pagdala kanila sa Simbahan. Sa pagpangalagad nga mao unta ang akong kagustuhan apan dili nako makita ang ilang interest. Dili sab nako gusto nga ipugos kay mamahimo lang nga hinungdan sa pagka kontra gusto. Apan ako padayun sa pagpangalagad aron ilang masaksihan kung unsay angayan. Yes, dunay mga paglapas usahay kay lagi tawo lang, huyang nga usahay masipyat gayud. Hinoon akong mga kalapasan maka-ingon ako ug dili ingun bug-at ug dako apan lagi gamay man o dako sama gihapun nakalapas.

Ang ako lang, nga sama nako nagapangalagad sab, duna pa diay mas dakong tulubagon kumpara nako. Sa akong kabahin duna man akoy kaikug ug konsensya apan duna sab uban nga wala nakaila niini. Wagas kung makalapas. Gawas na kita sa kung unsay atong personal nga relasyon sa GINOO. Kita ra ang nasayud niining tanan.

Unta duna pay higayon nga makabawi pinaagi sa pagpangalagad kay basin ulahi na ang tanan ug magmahay.

Salamat sa higayon nga nakapaambit ko niining akong kasinatian.

Mario

* * * * * *

Dear Mario,

Usa ka gasa sa Simbahan ang mga indibidwal nga nagapangalagad dinha tungod murag nihit na gyud ang mga bokasyon sa pagkapari o pagka madre. Mao nga nanginahanglan gyud og kaakibat ang simbahan aron makaserbisyo sa mga parokyano. Mao nga usahay, sama sa imong kahimtang, makabati kita og disappointment nga dili nato madani ang atong kabanay nga mag serbisyo sab sa simbahan.

Sumala sa imong gipadayag, tinuod, dili sab sila pugson tungod maapektuhan ang ilang pagserbisyo kung kini kontra gusto sa ilang kabahin. Dugang pa niini, imong nakita nga murag wala silay interes niining matang sa serbisyo. Apan, bisan pa ingon ani ang sitwasyon, salamat sa Dios nga nagpadayon gihapon ka sa imong ministriya. Nagtoo ako nga ang atong Ginoo naa gihapon laing plano alang kanila. Hinumdumi nga daghan pang mga paagi sa pag-alagad sa Ginoo ug tingali naa silay lahi nga calling, ug ginaandam lang sila sa Ginoo, sa Iyang kaugalingong mga paagi ug sa Iyang kaugalingong panahon. Ang matag usa adunay kaugalingon nga gasa ug mahimong gusto sa atong Ginoo nga ipaambit nila kini sa ubang mga ministriya. Salig lang Kaniya kay naglihok sab na Siya sa ilang kinabuhi. Tingali wala ka lang makaamgo niini apan sigurado nga ang mga bunga ug mga panalangin gikan sa imong kaugalingon nga pagpangalagad mahimong ibubo ngadto kanila. Sa kasamtangan, padayon lang sa pag-ampo aron sila malamdagan, sa Balaang Espiritu, ug aron sila makatubag bisan asa sila tawgon sa atong Ginoo sa pag-alagad Kaniya. Siya na ang magdumala sa dalan nga ilang subayon kay nahibal-an Niya kung unsa ang labing maayo alang kanila ug kon diin sila labing maayo nga makapaambit sa ilang kaugalingong giftedness. Remember, our ways are not God’s ways. Busa, ayaw kawad-i og paglaum. As mentioned earlier, God will make things happen in His own way and in His own time.

Sa laing bahin, naghisgot ka nga samtang ikaw nag-alagad sa Ginoo, naningkamot ka nga mahimong saksi ngadto sa imong pamilya kon unsay husto ug angay nga buhaton, bisan pa adunay imong kaugalingong mga kalapasan,..ug matud pa nimo… “kay lagi, tawo lang, huyang nga usahay masipyat gayud”.

Sa pagkatinuod lang, usa kini ka mapaubsanon nga lihok… ang imong pag-angkon sa imong mga kalapasan. Apan ang pagtandi sa imong kaugalingon sa uban, ang pagtan-aw sa imong kaugalingong mga kalapasan ingon nga mas gamay o mas gaan lang kini kumpara sa uban, usa kini ka tentasyon sa pagtan-aw sa imong kaugalingon nga mas maayo ka kaysa ilaha. Busa, makaingon kita nga kini usa ka aksyon nga nagpakita sa garbo sa usa ka tawo ug kinahanglan suklan gyud kini nga tentasyon.

Likayan ang kalagmitan nga “makita ang puling sa mata sa imong igsoon apan dili nimo makita ang troso sa imong kaugalingong mata” (Matt 7:3). Ato unang atubangon ang kaugalingong mga sayop o mga kalapasan ug mamalandong sa mga paagi sa pagbuntog niini aron kita mahimo na sa pag-ayo sa atong dalan.

Niining panahon sa Pasko, hinaut nga ablihan mo ang imong kasingkasing sa tumang pagpaubos, sama Kaniya, samtang magpadayon ka sa pagalagad sa iyang katawhan pinaagi sa ministriya nga gitawag kanimo.

Have a more blessed and grace-filled Christmas!

God bless you more.

Ate Emz