Paglipay kamo, kay moabot na ang Ginoo

Disyembre 17, 2023 ika-duhang adlaw sa Misa de Gallo sa alas kwatro y media sa kaadlawon, atol usab sa Sunday Sponsor sa mga SoCCom, human sa Santos nga Misa nagpahigayon og Advent Recollection & Team Building/Christmas Gathering ang maong ministriya sa San Roque Parish-Malabog.

Sanglit ang mga SoCCom sayo pa sa kabuntagon nangabot alang sa pagtambong sa ika-duhang adlaw sa Misa de Gallo ug Sunday Sponsor niini, kapin kwarenta nga mga SoCCom sa Parokya na namahaw.

Gisugdan ang Advent Recollection sa alas otso y media sa buntag nga adunay tema nga, “uban ni Sr.San Roque, Maayong Magsasangyaw kauban sa Simbahan nga nagapanaw nga adunay Gugma ug Kalinaw.” Kini gihatagan og pagpalalom ug pagpasabot ni Rev. Angelo Espinas konekta sa iyang topiko nga Synodal Church. Matod pa niya angay pamalandungan ang pulong nga “encounter” diha sa pagkatawo o pag-abot sa Ginoo nga Siya ang mahimong modelo isip mga SoCCom aron mahimong maayong magsasangyaw, kauban sa Simbahan nga nagapanaw. Iya usab nga gidasig ang matag usa nga dili lang taman sa pagcommentator ug pagdokumento kondili maningkamot nga makasulat o makahimo og artikulo sa mga kalihukan sa GKK ug sa Parokya, ma-apply o mabuhat. Sumala pa niya, “adunay Gugma sa pag-alagad aron makaangkon og kalinaw isip usa ka SoCCom.”

Gisunod ang Team Building/Christmas Gathering, nagpaambit sa mga kasinatian ang pipila kanila sa pag-alagad diha sa ilang GKK, adunay hamubo nga programa nga nahitabo, nagpasundayag ang matag sona, adunay mikanta ug aduna usab nanayaw. Duna puy mga padula alang sa pagpadayag nila sa mga pulong, “Paglipay kamo, kay moabot na ang Ginoo”, dayon nagbayloay og mga regalo, human nagdungan sa pagpangaon alang sa paniudto.

Sa Kanunay Dalaygon ang Dios.

(Arlene R.Tarnate-San Roque Parish-Malabog SoCCom)