Ang Pamilya sa Dios

Kapistahan sa Sagrada Pamilya ni Jesus, Maria, ug Jose (December 31, 2023)
Sir 3:2-6, 12-14 / Ps 128:1-2, 3, 4-5 / Col 3:12-21 or 3:12-17 / Lk 2:22-40

Ang kapistahan sa Sagrada Pamilya ni Jesus, Maria ug Jose usa ka pagpadayag nga ang matag pamilya gimbut-an sa Dios nga diin ang Anak sa Dios nakig-ambit sa atong pagkatawo aron kita nga iyang katawhan makadawat sa kaluwasan nga iyang gisaad alang kanatong tanan. Ang kaluwasan nga nagagikan sa Dios lamang nahimugso tungod sa pagkahimugso sa Anak sa Dios dinhi sa atong kalibutan. Si Jesukristo ang gitagna sa mga propeta nga moabot sa kalibutan aron sa pagluwas sa katawhan gikan sa kaulipnan sa sala ug paghatag sa kagawasan aron mabuhi.

Si Simeon ug propeta Anna nagpadayag sa ilang dakong kalipay tungod kay ilang nakita ang kaluwasan sa dihang ang atong Ginoong Jesukristo gihalad sa ilang ginikanan didto sa templo sumala sa balaod ni Moises. Ang kalipay nga ilang gibati tungod kay ilang nahimamat ang Dios nga magluwas sa tanan mao usab unta ang atong kinaiya kon kita makabati sa presensiya sa Dios diha sa atong kinabuhi. Kini maghatod kanato sa pagsimba sa tinooray ngadto sa atong Dios ug magdala kanato sa kalipay, aron kining maong kalipay atong ikapadayag ngadto sa uban nga atong gikahimamat sa dalan nga atong gisubay paingon ngadto sa Gingharian sa Dios. Daghang mga hari, propeta ug mga balaang tawo ang gustong motan-aw sa Mesiyas apan wala sila makakita. Sa atong bahin kita isip mga disipulo sa atong Ginoong Jesukristo, nakasinati sa iyang presensya, kita gilauman nga magpadayag sa iyang pagka-anaa diha kanato aron kadtong nakasinati sa kangitngit o kadulom sa kinabuhi mahayagan sa presensya sa Dios pinaagi kanato.

Sa katapusan, atong pakatawhon ang Ginoo diha sa atong kinabuhi ilabina diha sa atong mga buhat ug pagpakig-relasyon sa atong isigkatawo aron ang matuod nga presensiya niya mabati sa tanan. Sama sa gihimo sa mga ginikanan ni Jesus wala sila makasabot sa gipamulong ni Simeon ug Anna apan sila nagmapadayonon sa pagtubag sa tawag sa Dios nga mahimong ilhanan sa tanan nga mga pamilya ug mahimong giya unsaon magmabungahon diha atubangan sa Dios. Ang ato usab nga mga pamilya mamahimong sumbanan sa tanan bisan luyo sa hagit nga gustong gub-on ang pamilya. Kita mamahimong mga buhing timaan ug mobarog nga lig-on ug andam sa pagpanalipod sa kamatuoran nga gipadayag sa Dios kanatong tanan. Ang atong kinabuhi kanunay nagpunting sa Gingharian sa Dios, atong i-sentro kini kanunay ngadto kaniya. (Rev. Soren Abellanosa)