Pangandoy nga Mahisama kang Maria

Ang parokya sa Immaculada Conception Mintal nagsaulog sa ilang ika-64 nga kapistahan niadtong Disyembre 8, 2023. Ang tema, “Birhen Maria: Bulahan nga Pinili sa Pagkamodelo sa Pagkamaayong Piniyalan.”

Gisugdan ang maong kasaulogan sa kapistahan pinaagi sa pagpahigayon sa Pilgrimage Mass diin gituyok ang saysenta kapin na mga kapilya nga nahisakop sa maong parokya. Nagpahigayon usab ug rekorida ang mga batan-on isip usa ka pamaagi pahibalo sa mga katawhan kung unsa ang mga aktibidadis ug katikaran alang sa umaabot nga kapistahan.

Niadtong Disyembre 7, 2023 adunay nahitabo nga prosesyon kauban ang atong inahan, Birhen Maria diin gituyok ang población sa Barangay Mintal. Gidala usab sa mga GKK Servant Leaders ang ilang mga santos ug kini giuban sa prosesyon pinaagi sa pagsakay sa mga nagkadaiyang nindot nga mga karo. Nahimong malinawon ug maampoon ang nahitabong prosesyon.

Pagkahuman sa ika-siyam nga adlaw sa novena, adunay programa nga giandam ang tanang mga GKK Servant Leaders ug kini gipangulohan sa mga batan-on. Ang tema sa maong Parish Night, “Kantahan at Sayawan para kay Maria”. Adunay nagkadaiyang presentasyon ang gigahin ug gipangandaman sa mga miapil niini. Adunay nisayaw ug Festival and Folk dances, adunay mikanta, ug ang mas gikalingawan sa tanan ang Community Dance nga diin nanayaw ang tanan, hamtong man o batan-on. Dinhi gayud nakita ang suporta sa mga hamtong padulong sa mga batan-on ug ang gugma sa mga batan-on padulong sa mga hamtong. Pagkanindot lantawon ang mga nahitabo tungod makita gayud sa mga nitambong ang panaghiusa ug kini tungod kang Birhen Maria ug ang iyang anak nga si Jesus.

Labaw sa tanan, ang pagsaulog sa Santos nga Misa alang sa kapistahan sa Immaculate Conception gipangulohan ni Most Rev. Romulo G. Valles, DD inubanan sa mga pari dinhi sa Dakbayan sa Davao ug ang mga nagkalain-lain nga mga clergies gikan sa congregations. Nindot kaayo ang mga pahinumdum ni Archbishop Valles. Usa na niini ang pamaagi sa atong paglantaw sa kinabuhi. Dili lang dapat kita mutan-aw unsay naa sa ubos ug unsay nasa lebel sa atong mga mata. Apan kita dapat mulantaw pa sa taas ug kita mangandoy nga mabuhi sa kalimpyo sama ni Maria aron kita makasulod sa himaya nga walay katapusan. Ang maong misa gilangkuban sa mga katawhan, sona, nagkadaiyang ministriya nga nasakupan sa parokya.

Bago pa nahuman ang adlaw sa kapistahan, adunay gipahigayon nga basketball exhibition game nga ang mga partisipante mao ang Davao Clergy Team ug ang mga GSL sa Immaculate Conception Parish nga gipangulohan sa among parish priest nga si Rev. Fr. Johnny Autida. Pagkahuman sa dula, adunay salo-salo na nakadugang sa kalipay sa mga bisita una sila nanguli. (Jomar Jice L. Gatab | Photos by Roy Felix Abrio)