Walay imposible sa Diyos

Ika-4 Domingo sa Adbiyento (December 24, 2023)
2 Sm 7:1-5, 8-12, 14, 16 / Ps 89:2-3, 4-5, 27, 29 / Rom 16:25-27 / Lk 1:26-36

Unsa ang imong buhaton kung makadawat ka’g usa ka makapakurat nga balita? Tingali ang unang mosantop sa imong hunahuna mao ang pag-ampo ug pagpangayo og giya ug kalig-on gikan sa Ginoo.

Sa dihang nadawat ni Maria ang pagpahibalo gikan kang anghel Gabriel nga mabdos siya sa batang Jesus, mahimo nga nakurat siya sa makadiyot, dayon pagkahuman tingali’g nag-ampo siya sa maayong Ginoo alang sa giya ug kusog. Human niadto uban sa pagtoo iyang gidawat ang kabubut-on sa Ginoo alang niya.

Ang pagpahibalo sa pagkahimugso ni Jesus nagpasabot kanato nga walay imposible sa Dios. Nga ang Dios makahimo ug mga milagro sama sa Iyang gibuhat kang Maria. Nagpasabot kini kanato nga ang atong Dios maoy Dios sa mga posibilidad ug mga milagro. Ang atong Dios makahimo sa mga butang nga mahitabo alang kanato samtang kita adunay dili matarug nga pagtoo diha Kaniya.

Kung gibati nimo ang kakapoy sa imong panaw kauban ang Ginoo, ayaw kaluya, padayon sa panaw uban Kaniya ug masaligon nga mogunit Kaniya. Kay dili Niya pasagdan kadtong nagpadayon sa pagsalig Kaniya.

Busa karong Dominggoha, atong tan-awon si Maria. Siya ang Inahan sa Nagpakatawo nga Dios, si Jesu-Kristo. Siya usab ang atong Inahan, atong modelo ug atong inspirasyon. Atong pasalamatan ang Dios sa paghatag kanato sa Iyang Anak nga si Jesus ug buhaton nato kini pinaagi sa paghalad kang Maria isip atong labing maayong gasa, ang labing dako nga garbo sa katawhan. Ug labaw sa tanan, atong sundogon ang ehemplo ni Maria sa iyang mapaubsanong pagkamasinugtanon nga naghimo kaniya nga labing gawasnon sa tanang kasal-anan ug labing gawasnon sa paghigugma sa Dios sa hingpit. (Rev. Ranie Boy Pamplona)