Kataposang Meeting sa Tuig

“Bisan sa hulga sa seguridad, sulod sa Mindanao Week of Peace, nagpadayon gihapon kita, you are at home in the Diocese of Mati,” mga pulong ni Most Rev. Abel Apigo, DD sa iyang pasiunang mga pulong alang sa pagdawat sa mga partisipante sa 4th Quarterly Meeting sa sub-region sa DADITAMA niadtong Desyembre 5-6, 2023 didto sa OK Hotel and Restaurant Badas, Mati.

Pipila ka mga importanteng mga hilisgutanan ang gilatad sulod sa maong meeting apil na ang milabayng piniliay sa Barangay and SK Elections niadtong Oktubre. Resulta sa maong panaghisgot ang paghimo sa usa ka post election statement gikan sa atong mga obispo. Pipila ang nakaingon nga nagmalampuson kining milabayng eleksyon apan daghan man gihapon ang mga krimen nga nahitabo, apil na ang pagpamatay ug vote buying.

Sa laing bahin, nagpresenta sab ang kasamtangang Rector sa atong Regional Major Seminary of Mindanao nga si Rev. Fr. Rene Retardo mahitungod sa umaabot nga selebrasyon sa ika-60 nga anibersaryo sa seminaryo. Bisan paman sa mga kakulangan ug kalisud nga giatubang nagpadayon gihapon ang misyon. Gani dunay mga plano sa mapadayunong pagtabang sa mga dyosesis sa sulod sa DADITAMA.

Pagkagabii sa maong meeting ang pre-Christmas celebration diin dunay mga padula nga giandam ang dyosesis sa Mati. Pipila sab ka higayon nga gipasayaw ang mga partisipante sa pagpangulo sa mga brother seminarians isip mga animators. Sadya ang mga nanambong sa maong meeting tungod sab sa mga papremyo ug sa mga regalo nga ilang nadawat isip pahalipay sa host diocese. Ulahi nga gipahitabo ang exchanging of gifts una namahulay sa kagabhion.

Sa ika-duhang adlaw sa meeting matapos ang Santos nga Misa, dunayng hamubo nga programa alang sa pagtak-op sa Mindanao Week of Peace. Nagtapok ang mga partisipante sa gawas alang sa pag-ampo sa kalinaw ug isip simbolo sa kagawasan ug kalinaw gipalupad ang pipila ka mga kalapati.

Makahuloganon nga panagtapok tungod bisan tuod sa mga kabalaka sa seguridad tungod sa di pa lamang dugay nga pagpamomba sa Marawi. Tiunay ug sinsero nga paghandom sa kalinaw sa tibuok kalibutan labi na sa atong nasud.