Paglaum luyo sa kalisdanan

Ang tawo nga nakasinati og kalisod daw wala nay kadasig ug paglaum, apan kini sukwahi sa kasinatian sa usa ka batan-on nga ang iyang kinabuhi nagpamatuod nga dili babag ang kakulangan ug kalisdanan sa pisikal aron makapangalagad. Si Alferny Troy V. Torres o mas nailhan nga Troy nga gikan sa parokya sa San Pablo, 24 anyos, estudyante sa Holy Cross of Davao College Inc. nangalagad isip organista. Usa siya sa mga differently abled nga nangalagad sa maong parokya, siya visually impaired o buta. Siya usa sa mga organista sa San Pablo sulod na sa pito ka tuig kauban usab ang mga nahimo niyang klasmeyt sa school for the blind ning syudad sa Davao.

Saysay pa niya nga wala mamahimong babag ang maong balatian gani gihimo pa kini niyang inspirasyon sa pagpangalagad kay nasayud man siya nga kini gasa gihapon kaniya sa Ginoo, usahay mahunahunaan niya ang ikasulti sa uban kung makaya ba gayud niya apan wala niya gihimo kining babag ug mas iya pa hinuong gipakita nga bisan tuon aduna siya’y kalahian, kaya niya nga daw way babag sa iyang gusto sa pagpangalagad. Kini iya gayung gitanom sa iyang hunahuna ug kasing-kasing nga mualagad siya sa Ginoo pinaagi sa musika. Saysay pa niya nga kalipay niya ang paghatag ug higayon panahon sa pag-alagad panahon sa Misa diha sa iyang pagduyog nga daw iyang hatagan og isnpirasyon ang mga manimba pinaagi sa iyang pagduyog.

Sa pangutana nga niabot ba sa punto nga nakapangutana siya og nganong ingun-ini ang iyang kahimtang, kini ang iyang tubag “in terms of negative things, wala. Kay gina treat man ko sa akong family as normal. Ilang ginapa feel nako sukad tong bata pa jud ko, nga sight ray nawala sa ako, I’m just still a normal person. Kung unsay ginabuhat nila, gina apil ko nila.” Hinuon gigamit pa ni Troy ang iyang pagka visually impaired nga maka inspire pa sa uban bisan pa man nga dili siya kakita, naa man pud siyay talent nga gihatag kaniya sa Ginoo.

Gipangutana usab si Troy kung unsay gina bati niya sa panahon nga dayegon siya ilabi na sa mga parokyano, kini maoy iyang saysay “okay ra man, dili ko ka ingnon na happy ko, di sad ko makaingon nga sad ko. Kay first of all, ang Ginoo man naghatag ug talent nako, kanang compliment, murag extra na lang gud na siya, ang importante man nako is maka serve sa Ginoo.” Mensahe niya sa sama niya nga adunay kakulangan sa panan-aw ug sa mga adunay kadasig sa pagpangalagad, “i-feel ninyo gi tawag mo sa Ginoo even unsa pa may hadlang, God will make a way for that. Gamiton nato ang atong talent nga mag alagad sa Ginoo, even sa atong mga kakulangan and sa hardship sa life.” Si Troy mao ang kasamtangan nga organista sa adlawng Dominggo sa parokya sa San Pablo alas 4:45 hapon ug alas 6:00 sa gabii. (Lord Brian Origines)