Solemnidad Ni Kristong Hari

Tagum City, Nobyembre 26, 2023 – Gipahigayon ang malipayong pista sa simbahan ni Kristong Hari sa Parish of Christ the Eucharistic King sa Diocese of Tagum, aron saulogon ang ika-76 nga tuig sa pagkamugna sa parokya. Kini nga pista gipahimamat sa tema nga:

“Nagkahiusang katawhang piniyalan sa Dios sa pagpadayag sa pagkahari ni Kristo.”

Ang pista mao ang pagsaulog sa dakong paghinumdum sa Solemnidad ni Kristong Hari, nga gipahigayon sa sugo ni Pope Pius XI niadtong 1925. Kini nga okasyon usa ka paghandum sa paghari ni Kristo sa tibuok uniberso.

Ang Santos nga Misa alang sa pista gipangulohan ni Most Rev. Medil S. Aseo, D.D., ang obispo sa Diyosesis sa Tagum. Kauban niya ang pipila ka mga kaparian nga sila; Rev. Msgr. Federico M. Mantica, Fr. Allan O. Alindajao ug Fr. Roy D. Belocura; mga diakono ug seminarista. Sa homiliya sa halangdong obispo siya miingon, “Isip sumusunod ni Kristo kita gina-awhag sa pagbuhat og gugma’g kaluoy dili lamang sa pulong.”

Sa matag pagsaulog sa pista sa Simbahan ni Kristong Hari, namalandong ug nangangamuyo ang mga matoohon aron pasalamatan ang grasya ug gugma nga ilang nadawat gikan sa Dios. Kini nga pista usa ka pagpakita sa paghigugmaay ug pag-ampo nga nagdala og dakong kahayag sa matag kinabuhi sa komunidad sa pagtoo. (Sara Mae Sotomil)