BEC: Pundasyon sa Diyosesis sa Mati

Malampusong gipahigayon ang 2nd BEC Convention sa Diocese sa Mati, Nobyembre 29-30, 2023 didto sa St. Therese Gym, Clergy House Compound, Mati City, inubanan sa temang “Diocese sa Mati: Upat ka Dekada nga Sinodo nga Panaw Diha sa Pagtoo, Pagpasalamat ug Misyon.

Ang maong panagtigom gilangkuban sa mga liboan kapin ka delegado sama sa mga opisyales nga nagrepresentar sa nagkadaiyang GKK sulod sa mga Parokya sa diyosesis. Human ang registration, adunay calling of attendance nga gipahitabo matag vicariate. Sunod niini, gipahigayon ang motorcade libot sa poblacion sa siyudad sa Mati.

Sa pagbalik sa mga partisipante sa venue sa maong convention gisugdan ang unang pagpadayag nga mao ang “DA Program Cascading Down to GKKs”, diin gipasabot sa unang mamumulong nga si Dr. Edito Sumile ang mga nagkalainlaing makabuluhanong pamaagi sa pagtanom sa tugkaran, ug pag recycle sa mga basura kon diin mapuslan pa kini sa pagpananom. Human ang maong pulong, adunay open forum diin gitubag sa maong mamumulong ang mga pangutana ug klaripikasyon sa kadaghanan.

Ang ikaduhang mamumulong mao si Mrs. Cynthia Masinaring, diin gihubad niya ang kasaysayan sa diyosesis sa Mati ug ang mga unang GKK nga nahimugso gikan niini. Gibatbat niya ang mga kagikan sa matag GKK ug ang mga estorya ug kaagi nga nakalangkob niini.

Ang ikatulo ug gipaabot nga mamumulong sa tanan, mao si Most Rev. Abel C. Apigo, DD, halangdong obispo sa Mati, diin gisaysay niya ang iyang topic na “BEC the Life Blood of the Diocese of Mati”. Sa iyang pulong, gipadayag ni Bishop Apigo ang importansya sa matag GKK ug ang dakong kalambigitan niini sa sinodong panaw sa simbahan. Iya usab gipahinumdom ang dakong kabahin sa matag opisyales sa pagpalambo sa GKK ug sa kinatibuk-an sa simbahan, bisan pa sa mga kahuyang nga nasinati niini sa maong panaw ug ang pagpaningkamot nga magmalig-on sila inubanan sa grasya sa Dios.

Human sa mga makabuluhanong pagpadayag sa mga mamumulong, gisundan dayon kini ug Santos nga Misa ug gitapos ang unang adlaw sa usa ka salo salo ug Socio-Cultural Night diin gipasundayag sa mga representante sa matag vicariate ang ilang talento sa paghulagway sa mga kaagi ug kagikan sa pagsugod sa ilang mga GKK ug parokya.

Sa ikaduhang adlaw, gisugdan ang mga aktibidades ug usa ka Praise and Worship nga gipangulohan sa Charismatic groups. Para mahimong lagsik ang mga partisipante, ang pagtawag sa attendance gisundan ug cheers and yells sa matag vicariate. Tapos niini, gisugdan na sa ikaupat nga mamumulong nga mao si Rev. Fr. Edilberto Mahinay, Vicar of the Clergy ang iyang topic mahitungod sa “Development, Theological and Nature of BEC”. Human sa makabulohanong pagpadayag, gisunod ang usa ka Santos na Misa nga gipangulohan ni Bishop Apigo. Nasundan kini sa salo salo ug gitapos sa awarding ceremony sa mga partisipante.

Sa katapusang bahin, nahimong makabuluhanon ug malampuson ang kinatibuk-an sa 2nd BEC Convention kung diin nanghinaot ang tanan sa malampusong pagsaulog sa ika kwarenta nga Jubileyo sa Diyosesis sa tuig dosmil baynte kwarto. (Krystel Esteban | SoCCom, Mati)