Kultura sa Kalinaw

Gipahigayon ang ecumenical prayer alang sa launching sa Mindanao Week of Peace sa dakbayan sa Davao niadtong Nobyembre 30, 2023 nga mao ang unang adlaw sa kasaulogan didto sa University of Mindanao, Ilang Campus. Kini gitambongan sa 40 ka mga partisipante sa nagkalain-laing mga sekta sulod sa dakbayan. Gisugdan kini sa pag-awit sa “Let there be Peace” ug sa mga pag-ampo diin nauna si Ustadz Ampilani gikan sa Muslim Community ug gisundan ni Rev. Fr. Rey Sabuero nga Assistant Parish Priest sa St. Francis of Assisi Parish sa La Verna.

Giabi-abi ang tanan ni Mrs. Virginia Yagong nga gikan sa UM Ilang High School. Siya nanghinaot nga una palang kini sa mga panagtigum sa mga bantugan ug hawud nga mga pangisip sa ilang eskwelahan. Siya usab naghandom duyog sa tanan sa hingpit nga kalinaw.

Sa tumong nga giandam sa Archdiocesan Center for Ecumenical and Interreligious Dialogue Director sa Arsidyosis sa Dabaw nga si Rev. Fr. Pedro Lamata, iyang gibatbat ang nagpaluyong mga rason sa maong kalihokan. Tuig 1996 natukod ang Bishops-Ulama Conference. Kini nga katoliko nga mga obispo, o obispo sa ubang kristiyanong nga tinuohan. Ulama, sa Arabic, plural o daghan alim. Kining mga ulama ang mga Islamic religious scholars, religious teachers. Sa panaghigalaay sa atong mga lideres sa simbahan kay kanhing president Fidel V. Ramos, nakapahigayon siya ug usa ka malukpanon nga konsultasyon sa tibuok Pilipino kon unsay buhaton aron ang pundasyon sa kalinaw mahitabo sa Pilipinas. Ang tumong ug tuyo niining Bishop Ulama Conference mao ang kultura sa kalinaw nga maghari unta dinhi sa Mindanao.

Ang atong pagsaulog niining Mindanao Week of Peace, naggikan niini nga mga lakang. Busa niadtong panahon ni Presidente Gloria Arroyo namugna ang Proclamation No. 127 series of 2021 nga nagdeklara nga sa matag katapusang Hwebes sa Nobyembre hangtod sa unang Miyerkules sa Desyembre mao ang Mindanao Week of Peace.

Kini nga deklarasyon dako gayod og tabang kanatong mga Pilipino, labi na gyud kitang mga lumulupyo sa Mindanao. Kahinumdoman nga bag-ohay lang gipahitabo ang usa ka panagtigom alang sa pag-ampo sa kalinaw niadtong Nobyembre 9 sa Coastal Road. Ang kadaghan sa mga tribo ug kapuno sa kultura natong mga Pilipino wala naka babag sa pagpalapnag sa kultura sa kalinaw.

Hinaot nga kini nga kasaulogan magpadayon hangtod sa hangtod ug nga kitang mga katawhan mag-amping niini pinaagi sa pagtahod sa usag-usa.